A Xunta aproba definitivamente o PXOM de Ribadeo

A Consellería de Medio Ambiente, Territorio e Infraestruturas aprobou hoxe definitivamente o Plan Xeral de Ordenación Municipal (PXOM) de Ribadeo. A conselleira, Ethel Vázquez, visitou hoxe o Concello de Ribadeo, onde mantivo unha reunión co alcalde, Fernando Suárez.

Vázquez Mourelle salientou a importancia de que un concello acade a aprobación do seu plan xeral, posto que isto supón definir como se quere que sexa o pobo de mañá. No caso de Ribadeo, trátase dun planeamento que marcará a ordenación deste concello, cunha superficie de 103,32 km²e unha poboación de case 10.000 habitantes, durante os próximos 18 anos, tal e como explicou a conselleira.

A conselleira salientou que este plan xeral é a ferramenta urbanística que permitirá preservar os valores paisaxísticos, xa que as zonas verdes representan case un 19% máis do que se esixe por lei, ao tempo que potencia as capacidades turísticas.

Ribadeo é un municipio de carácter turístico, entre outros atractivos, pola singularidade da súa paisaxe, polo que o PXOM pretende promover a preservación dos valores culturais e paisaxísticos sen que deixe de ser compatible coa actividade económica.

O planeamento tamén contempla a mellora das comunicacións das áreas urbanas e destas cos municipios veciños. O plan considera unha rede viaria estruturante para este concello, situado no ámbito territorial da dinamización económica que supón a Autovía do Cantábrico.

O documento aprobado hoxe potencia os espazos libres e as zonas verdes, xa que é un municipio moi deficitario neste eido, de feito, o PXOM destina a estes espazos un 18,75% máis que o que esixe a Lei.

O solo rústico é un piar fundamental desta planeamento, posto que representa o 92,62% da superficie, motivo polo que a protección dos valores ambientais, paisaxísticos, culturais e produtivos é un punto estratéxico do plan.

O PXOM contempla a necesidade dun Plan Especial para protexer o contorno da Praia das Catedrais –a redactar polo Concello-, para regular o acceso e as zonas para aparcar. Así, resérvase unha zona de aparcadoiro entre o ferrocarril e a estrada de Barreiros á Devesa. Das dúas zonas que actualmente se utilizan de aparcadoiro, a que contempla o PXOM é a que está regulada e urbanizada, a certa distancia da praia.

O plan xeral tamén conserva e pon en valor os asentamentos rurais mediante o recoñecemento de 126 núcleos rurais, todos existentes, e que son segregados do urbano e coa seguinte distribución parroquial: Arante, Cedofeita, Couxela, Covelas, A Devesa, Ove, Piñeira, Ribadeo, Rinlo, Santalla de Vilausende, Vilaframil e Vilaselán.

O PXOM, tendo en conta 2 núcleos urbanos (Rinlo e Ribadeo) cun notable crecemento demográfico, pretende colmatar e densificar os núcleos máis desenvoltos, evitando o crecemento desordenado, e dotar a estas localidades de zonas verdes e equipamento.

No seguinte cadro indícanse os tipos de solo delimitados no planeamento coas súas respectivas superficies.

Concello importante para a Xunta

A conselleira de Medio Ambiente destacou que Ribadeo é un concello importante para a Xunta de Galicia, en xeral, e para o seu departamento en particular, xa que as colaboración e proxectos que este departamento do Goberno galego apoia neste municipio son una mostra do compromiso e da importancia.

Ademais das axudas para a rehabilitación, para a construción do parque de Santa Catalina en Rinlo, do aparcadoiro na rúa Rodríguez Murias e da depuradora de Ribadeo –que agora está en construción o emisario- proxectos que suman uns 25 millóns de euros, a Xunta traballa na redacción dun Plan especial para protexer o contorno da Praia das Catedrais, que virá a desenvolver o Plan de Conservación que se está a redactar e no que considerou fundamental a colaboración institucional e as achega de todos.