Os escolares do Porriño doan máis dunha tonelada de alimentos

Máis dunha tonelada de alimentos foron a resposta da comunidade escolar do noso municipio á campaña que, baixo a lema “Axúdanos”, puxo en marcha SOS Porriño con motivo da celebración o pasado venres do “Día Internacional para a Erradicación da Pobreza”, deixando patente, unha vez máis, o espírito solidario dos porriñeses.

A Concellaría de Benestar Social, que dirixe Teresa Veloso, en colaboración coa Concellaría de Educación, con Ana Martínez á fronte, perseguen con esta campaña sensibilizar aos escolares das necesidades que atravesan as persoas en situación de pobreza, ao mesmo tempo que achegan o seu granito de area recollendo alimentos para axudar a familias con escasos recursos.

Paquetes de arroz, leite, galletas, azucre, legumes e pasta, así como aceite e conservas foron os alimentos que os máis pequenos de Porriño doaron nos centros escolares.

Desde os Servizos Sociais do Concello de Porriño e SOS Porriño trabállase a diario para dar resposta ás demandas das familias máis necesitadas, levando a cabo diferentes iniciativas co obxectivo de colleitar alimentos. Desde a súa creación no ano 2011, SOS Porriño atende a familias do noso municipio usuarias dos Servizos Sociais. Os alimentos colleitados nas diferentes campañas, os achegados polo FEGA (Fondo Español de Garantía Agraria) a través de Cruz Vermella, así como as achegas de particulares e empresas, destínanse a axudar ás máis de 300 familias usuarias do banco de alimentos, que acoden periodicamente a recoller un lote de víveres que contén alimentos non perecedoiros. En función da tipoloxía da familia engádense outros alimentos, así, se hai nenos engádense outros produtos como galletas, leite en po ou potitos para bebés.

O leite, o arroz, o azucre, ou os alimentos para nenos son os máis demandados polos usuarios. Todos aqueles particulares ou empresas que desexen realizar unha doazón poden dirixirse aos Servizos Sociais do Concello de Porriño.