O goberno de Riveira investirá 75.000 euros en dotar de saneamento e pluviais ao camiño que conduce ao cemiterio de Corrubedo

O Concello de Riveira vén de aprobar un novo proxecto técnico en virtude do cal se vai dotar ao camiño do Cemiterio de Corrubedo de novos servizos de saneamento e pluviais, ademais de pavimentar os sobreanchos da calzada e asfaltar un tramo da vía que está en mal estado.

O desenvolvemento desta actuación comporta un investimento de 75.337,69 euros e o prazo de execución son tres meses.

Actualmente, o camiño obxecto do proxecto conta cun pavimento de rodadura con triple rego asfáltico; os sobreanchos están no seu estado orixinal (é dicir, con pavimento de terra natural); non existen cunetas e tampouco rede de saneamento.

Con tal motivo, no que se refire a saneamentos fecais, disporase un colector de PVC compacto de 315 milímetros de diámetro e 378 metros de lonxitude na zona de actuación, ademais de pozos de rexistro.

En canto á rede de pluviais, estará conformada por un colector de PVC corrugado de 315 milímetros de diámetros e 48 metros de longo (colocaranse arquetas sumidoiros cada 20 ou 25 metros aproximadamente); ademais de 454 metros de cuneta nunha das marxes da vía.

Pavimentación dos sobreanchos

Igualmente, empregarase aglomerado asfáltico en quente tanto para a reposición do pavimento nas zanxas de saneamento e pluviais como para a pavimentación dos sobreanchos, que levarán un tratamento previo a base de zahorra artificial compactada.

Por último, existe un tramo de camiño cuxo pavimento de triple riego asfáltico atópase moi deteriorado, razón pola cal será substituído por outro novo.