O BM Porriño enfrontarase ao Colexio de Gaia no trofeo Festas do Cristo

Mañá martes 9 de Setembro, a partir das 20.30 horas, o Polideportivo Municipal do Porriño acollerá o encontro de balonmán feminino que enfrontará ao BM Porriño e ao Colexio de Gaia. As porriñesas loitarán por facerse co Trofeo Festas do Cristo deste ano 2014 co equipo luso, cuarto na pasada liga portuguesa pero serio aspirante ao título este ano.

Ambos os equipos enfrontábanse o pasado domingo para disputar a final do Torneo Santo Ovidio en Vilanova de Gaia, na cal finalmente se impuxo o BM Porriño cun axustado resultado.

Os afeccionados porriñeses terán oportunidade de ver ás xogadoras veteranas dirixidas por Abel Estévez e ás novas fichaxes, as irmás Andrea e Alba Dapena, Susi Sánchez, Anabel Mateo e Soraia Lopes.