Cores Tourís comproba a reforma da cuberta do colexio de Silleda onde se investiron 38.200 euros

Cores Tourís na visita ao Ceip de Silleda

O delegado territorial da Xunta en Pontevedra, José Manuel Cores Tourís, visitou esta mañá o CEIP de Silleda onde puido comprobar o remate dos traballos de reforma da cuberta do colexio de Silleda, onde a administración autonómica investiu 38.200 euros.

Durante a visita, o responsable territorial estivo acompañado polo alcalde de Silleda, Manuel Cuíña, así como polo xefe territorial de Cultura e Educación, César Pérez Ares, e o portavoz do PP da localidade, José Luis Espiño.

Estas obras, segundo destacou Cores Tourís, permitiron “atallar os danos causados polas filtracións de auga no interior do edificio, reducindo os posibles accidentes xerados polos esvaradíos, especialmente nos aseos da aula infantil”, matizando que foi necesario reparar os dous tellados dos corpos centrais das escaleiras, así como os dous laterais dos aseos de infantil.

Para solucionar os problemas que presentaba o tellado, “fíxose necesario demoler a cuberta existente nas zonas más extremas, executar unha sola auga, con panel sándwich, que mellora o illamento e non ten encontros perigosos”, matizou o responsable da Delegación territorial. “No concello de Silleda investíronse, durante os últimos anos, máis de 162.000 euros en obras nos colexios de Bandeira e Silleda”, engadiu Cores Tourís.

O delegado territorial da Xunta en Pontevedra quixo facer tamén referencia á implicación da administración autonómica cos centros educativos e coa calidade educativa da comarca do Deza, “xa que estamos a falar de máis de 6,5 millóns de euros destinados a obras de mellora e reforma tanto en Primaria coma en Secundaria durante os últimos anos”.

A nivel provincial, o delegado territorial recordou que a Xunta de Galicia está a realizar un importante esforzo no presente ano na mellora dos centros educativos de Pontevedra. “En total lévanse invertido máis de un millón e medio de euros no acondicionamento e reforma dos centros de Primaria e máis de 800.000 euros nos de Secundaria, sumando en total un investimento de máis de dous millóns trescentos mil euros nos centros educativos da provincia”, sinalou Cores Tourís. “Isto unido a colaboración por parte dos concellos, fai que a cifra ascenda aos tres millóns de euros”, concluíu.