Xuízo oral contra a exalcaldesa de Betanzos por prevaricación e falsidade documental

María Faraldo

O Tribunal Superior de Xustiza de Galicia (TSXG) abriu xuízo oral por prevaricación e falsidade documental contra a exalcaldesa da localidade coruñesa de Betanzos e agora deputada do PPdeG na Cámara autonómica, María Faraldo Botana como ela mesma confirmou.

O xuízo que a levará ao banco ten que ver coa contratación dun profesor para o Conservatorio Municipal de Música da localidade para o curso 2009-2010, a cal tería lugar malia as advertencias en contra do secretario, o cal sostivo que a avisou verbalmente.

Faraldo afirmou, que non houbo “informe” do secretario contrario a esta contratación e, de feito, indicou que cando o houbo foi “moito despois” e cando o profesor xa non estaba a traballar.

A deputada popular indicou que mantén a súa “inocencia” e incidiu en que, ao seu xuízo, o “procedemento era legal”. De feito, argumentou que houbo “15 casos anteriores” e é unha “fórmula reiterada nas lexislaturas do PSOE”. Precisamente, recordou que foron os socialistas os que levaron a finais do mandato, en 2011, unha moción para levar esta contratación á Fiscalía.

A DEVOLUCIÓN “NON “PODE PROSPERAR”

A Sala TSXG ditou un auto con data de o 31 de marzo no que desestimou o recurso de apelación contra a apertura de auto de procesamento e o pasado 26 de maio a representación de María Faraldo pediu o sobresemento libre da causa, pero finalmente se decretou xuízo oral solicitado polo Ministerio Fiscal e a acusación particular exercitada polo Concello de Betanzos.

No auto no que se confirma a apertura de xuízo oral arguméntase que a petición da devolución do sumario para que se recibise a declaración ao secretario do Conservatorio de Betanzos “non “pode prosperar” posto que, argumenta a sala do TSXG, “debeu facerse como petición principal e non subsidiaria”.

Ademais, engade que o maxistrado instrutor practicou toda a proba solicitada polas partes, “salvo a que xustificadamente foi denegada, non constatando que a proba agora solicitada estea en ningún dos dous casos”. Ao respecto, sinala que, non habéndose solicitada en fase sumarial, “agora aparece como extemporánea”.

Por este procesamento tamén sentarán no banco Alberto G.N., profesor de música do Conservatorio de Betanzos, pola eventual comisión dun delito de falsidade documental, e o director dese centro, Juan Antonio F.C., “pola súa probable participación nun delito de tráfico de influencias”, segundo o auto de procesamento agora confirmado.

CONTINUIDADE NO PARTIDO

Sobre a súa continuidade no escano, explicou que aínda non tivo tempo de falalo co partido, posto que recibiu o auto de xuízo oral na mañá deste mércores, e indicou que a decisión sobre o seu futuro se “determinará” cando o aborden. “En función do que falemos, determinarase a actuación”, declarou a parlamentaria galega do PP.

Os estatutos dos populares galegos implican a transformación de expediente informativo a disciplinario unha vez que se abre xuízo oral, pero a súa resolución –e polo tanto, a posible sanción con suspensión de militancia– non ten por que producirse ata que haxa fallo xudicial.

O caso máis recente é o acontecido o 19 de maio, cando sete edís de Santiago de Compostela que sentaron no banco por un suposto delito prevaricación aínda como militantes e en posesión da súa acta de concelleiros, polo que finalmente foron condenados a nove anos de inhabilitación especial para cargo público, tras o que si abandonaron a Casa do Concello.