Humana recolleu no Porriño un total de 12 toneladas de téxtil usado

Os seis colectores de recollida de roupa e calzado distribuídos polo municipio do Porriño acumularon no que vai de ano un total de 12.230 quilos de téxtil usado segundo os datos que Humana Fundación Pobo para Pobo, a organización non gobernamental encargada de xestionar esta recollida selectiva de roupa usada, achegoulle ao Concello do Porriño. O alcalde Nelson Santos valora moi positivamente o dato, “pois os recursos obtidos da xestión das máis de 12 toneladas de roupa e calzado, sumadas ás 29 do ano 2013, que doutra maneira non terían utilización proveitosa algunha, permitirán levar adiante importantes programas de axuda social nos municipios nos que Humana está presente, como é o caso do Porriño”.

Por outra banda, a recollida selectiva é unha ferramenta eficaz de xestión de residuos, así esta reciclaxe téxtil contribúe á protección do medio ambiente ao reducir en parte os residuos que xera a cidadanía. Neste sentido, a concelleira de Medio Ambiente, sinala que, segundo recóllese no informe realizado por Humana, “o téxtil que os veciños do Porriño depositaron nos puntos habilitados para tal fin evitou a emisión de 39 toneladas de _{CO 2} á atmosfera, que sumadas ás 93 do pasado ano, fan un total de máis de 132 toneladas”. Por iso, tamén parte dos recursos obtidos coa xestión do téxtil usado Humana destínao a desenvolver programas de protección do medio ambiente.

Estes seis colectores, situados en lugares de fácil acceso e gran tránsito -cinco deles no centro urbano e un en Torneiros-, foron instalados en outubro de 2012 por mor dun acordo entre o Concello e a fundación Humana, póndose así en marcha unha nova iniciativa, ao non existir até o momento colectores desta índole no municipio.

Sobre Humana

Humana é unha organización non gobernamental para o desenvolvemento (ONGD) que desde 1987 promove a protección do medio ambiente e leva a cabo programas de cooperación en África, América Latina e Asia grazas aos recursos obtidos coa xestión do téxtil usado. A organización conta con 5.200 colectores que anualmente recollen preto de 18.000 toneladas de roupa; no caso de Galicia, Humana ten 340 colectores grazas aos acordos de colaboración que mantén con diferentes concellos (como o do Porriño), entidades e empresas privadas.

As pezas depositadas en devanditos colectores teñen dous destinos, unha parte envíanse ás plantas de clasificación que Humana ten en Barcelona, Madrid e Selecta e o resto véndese a empresas de reciclaxe. As que son enviadas a estas tres plantas distribúense da seguinte maneira: o 13% destínase ás 32 tendas de segunda man que Humana ten en España, o 50% envíanse a África para a súa venda a prezos baixos a comerciantes locais co fin de satisfacer a demanda de téxtil destes países, o 30% atópase nun estado que non permite a súa reutilización polo que se vende a empresas de reciclaxe téxtil e o 7% restante destínase aos centros de tratamento de residuos porque está composta por pezas que non se poden reutilizar nin reciclar debido ao seu estado.