Prestixiosos concertistas daranse cita no Saxriveira Festival

Dende mañá mércores 25 ata o domingo 29 terá lugar en Riveira o ciclo de concertos denominado  SaxRiveira Festival.

Este festival enmárcase no último encontro do curso 2013/2014 da Aula Galega de Saxofón: serán cinco concertos nos que participarán artistas de gran prestixio tanto nacional como internacional como Rodrigo Vila (profesor invitado da Aula), os recoñecidos pedagogos e concertistas italianos David Brutti (saxofón) e  Filippo Farinelli (piano), así como Beatriz Tirado (saxofonista gañadora do Premio Nacional de Interpretación 2013), Thesis Quartet (cuarteto formado en parte por antigos alumnos da Aula que agora continúan estudos fóra de Galicia).

Os quince alumnos que este ano asistiron a Aula -procedentes de centros de formación de Ferrol, Vigo, Pontevedra, Vila de Cruces, Rianxo, Santiago e Riveira- asistiron durante todo o ano ao Conservatorio local para ampliar e complementar a súa formación co mestre Rodrigo Vila e que amosarán os seus progresos en dous concertos acompañados polo pianista Filippo Farinelli.

SaxRiveira Festival desenvolverase os mércores, xoves e venres ás 19 horas na Igrexa Parroquial de Riveira; mentres que o sábado ás 21 horas e o domingo ás 13 horas, celebraranse no salón de actos do Conservatorio Profesional de Música de Riveira.

Son todos abertos ao público e de balde.