Porrigalia estrea web e comeza o prazo para as inscricións nos I Xogos Olímpicos

“Algúns caeremos e uns poucos se renderán, pero todos loitaremos pola gloria da eternidade. Estades preparados?”. Desta maneira dáse a benvida á páxina web www.porrigalia.com que foi presentada esta mañá no centro cultural polo alcalde Nelson Santos e o concelleiro de Festexos e de Deportes, M. Alejandro Lorenzo, nun acto ao que asistiron asociacións e clubs deportivos, interesados en participar deste evento que se celebrará os días 12 e 13 de xullo coincidindo coa festividade local de San Benito (días 10 e 11), favorecendo así tamén aos sectores da hostalaría e o comercio.

Neste novo portal web recóllese, de maneira moi completa, toda a información respecto diso do desenvolvemento desta festa, que trae consigo a celebración dos I Xogos Olímpicos. No entanto, iranse actualizando algúns contidos como a programación definitiva, concretando lugares e horas, para esas dúas xornadas festivas nas que tampouco faltará a música cun concerto dun mítico grupo de rock español. Acendido da chama olímpica, desfile do cinco equipos, probas, preparación da pócima máxica, festa nocturna, exhibicións ecuestres e de cetraría, baile, xogos populares, concursos, loita de gladiadores, espectáculos circenses, representacións teatrais e unha infinidade de actividades cuxos escenarios serán o Parque Infantil, o barrio de San Benito, rúa Domingo Bueno, a avenida de Galicia, a zona peonil e o velódromo municipal.

Contidos: probas, equipos, rueiro, concursos e contacto

www.porrigalia.com divídese en diferentes seccións. No apartado de “equipos” enuméranse o cinco pobos que competirán nos I Xogos Olímpicos, tendo cada cal (persoa e/ou establecemento) decidir a cal pertencer: romanos, galos, exipcios, gregos ou celtas. Aquí explícase a indumentaria de cada unha destas civilizacións axudando así a engalanar os locais e a disfrazase para a ocasión, pondo mesmo imaxes de exemplo da vestimenta empregada.

Nas apartado “probas” exponse as doce modalidades a competir, así como o regulamento a seguir en cada unha delas, dando a oportunidade xa de poder inscribirse.

A web tamén recolle un rueiro ao cal se irán engadindo iconas coa localización dos diferentes establecementos participantes de Porrigalia, ademais de situar, en canto estea pechada toda a programación, a celebración de cada un dos eventos.

Outros dous apartados do portal son o de “concursos”, habendo catro: tapas, pócima máxica, fotografía e disfrace; e o de “contacto” onde calquera pode realizar preguntas e suxestións, unha opción que se pode facer tanto a través da web como tamén dirixíndose persoalmente ao centro cultural ou ao polideportivo, sobre todo os comerciantes e hostaleiros ante calquera dúbida que lle xurda.