Labores de prevención contra incendios forestais en Riveira

O Concello de Riveira, co ánimo de incidir na protección das persoas e bens fronte aos incendios forestais, fai saber o seguinte :

1. Que a Lei3/2007, do 9 de abril, de prevención e defensa contra os incendios forestais de Galicia, no ámbito municipal, establece unhas condicións de prevención específicas para as denominadas “redes secundarias de faixas de xestión de biomasa”, cuxa función prioritaria é a protección dos núcleos poboacionais, as infraestruturas, os equipamentos sociais, as zonas edificadas, os parques e os polígonos industriais. (Artigo 20.4 da Lei.)

2. Que nas “redes secundarias de faixas de xestión de biomasa” é obrigatorio para as persoas responsables xestionar a biomasa vexetal nunha franxa de 50 metros perimetral ao solo urbano, de núcleo rural e urbanizable delimitado, así como arredor de edificacións, vivendas illadas e urbanizacións, depósitos de lixo, parques e instalacións industriais, situadas a menos de 400 metros do monte, de acordo cos criterios para a xestión de biomasa estipulados na Lei e na súa normativa de desenvolvemento. Ademais, nos primeiros 30 metros non poderá haber as especies sinaladas na disposición adicional terceira da Lei. As distancias mediranse desde o límite do solo urbano ou núcleo rural, no seu caso. As distancias no caso de edificacións, vivendas illadas ou urbanizacións mediranse desde o paramento das mesmas. No caso de depósitos de lixo, parques e instalacións industriais, mediranse desde o límite das instalacións. (Artigo 21.1 da Lei.

3. Nos terreos situados en solo urbano, de núcleo rural e urbanizable delimitado, aplicaranse subsidiariamente os mesmos criterios establecidos no parágrafo anterior, salvo aprobación específica de ordenanza municipal ou en defecto da mesma.

4. No caso de cámpings, gasolineiras e industrias nas que se desenvolvan actividades perigosas, as distancias para as especies sinaladas na disposición adicional terceira serán de 50 metros, desde o límite das instalacións. No caso dos cámpings, esta distancia medirase desde o peche perimetral.

5. Traballos a realizar polos titulares/responsables dos terreos:

Na franxa dos 0 aos 10 m. perimetral ao solo urbano, de núcleo rural e urbanizable delimitado, así como arredor de edificacións, vivendas illadas e urbanizacións, …

Eliminación de todo tipo de vexetación herbácea, arbustiva e arbórea.

Na franxa dos 0 aos 30 m. perimetral ao solo urbano, de núcleo rural e urbanizable delimitado, así como arredor de edificacións, vivendas illadas e urbanizacións, …

Estrato arbustivo e herbáceo:

– Eliminación total da vexetación seca (vexetación arbustiva e herbácea seca) e eliminación total da vexetación arbustiva e herbácea existente na parcela (ata 20 cm.).

Estrato arbóreo:

– Corta das árbores pertencentes a especies non permitidas na franxa dos 30 m. dende a edificación (piñeiros, eucaliptos…).

– En todo caso poderán conservarse outras especies arbóreas (carballos, castiñeiros, bidueiros, ameneiros, sobreiras…) nas condicións que sinala a normativa (masas mixtas e distanciadas 7 m. entre elas, árbores de 0-11,4 m. poda ata 1/3 da altura, árbores >11,4 m. poda mínimo 4 m.).

Na franxa dos 30 aos 50 m perimetral ao solo urbano, de núcleo rural e urbanizable delimitado, así como arredor de edificacións, vivendas illadas e urbanizacións, …

Estrato arbustivo e herbáceo:

– Eliminación total da vexetación seca (restos de poda, vexetación arbustiva e herbácea seca) e eliminación total da vexetación arbustiva e herbácea existente na parcela (ata 20 cm.).

Estrato arbóreo:

– Poderán conservarse as árbores de calquera especie nas condicións que sinala a normativa (formando masas mixtas e distanciadas 7 m. entre elas, árbores de 0-11,4 m. poda ata 1/3 da altura, árbores >11,4 m. poda mínimo 4 m.).