Retómanse os traballos de ampliación da rede de pasarelas da praia da Catía

O Concello de Riveira informa de que esta mesma semana foron retomados os labores de ampliación da rede de pasarelas da praia da Catía en virtude dos cales este areal verá incrementado o seu sistema peonil en 475 metros, divididos en dous tramos, ata lograr dous quilómetros de paseo ininterrompido.

Cómpre lembrar que o inicio destes traballos foi realizado polos alumnos da especialidade de carpintería do obradoiro de emprego Tahúme, que concluíu o pasado mes. Agora, foron contratados temporalmente catro operarios que se encargarán de rematar a actuación.

Nestes momentos os traballadores están a obrar na ampliación do sistema de pasarelas dende A Catía en dirección á praia do Castro. A este novo tramo de 300 metros sumarase posteriormente outro de 175 metros no sentido inverso, ata O Carreiro.

Co fin de poder realizar esta acción, foi necesario adquirir a madeira tratada necesaria. A actuación foi adxudicada a Comercial Mallo Area, S.L., por un importe de 58.234,73 euros.