‘Porriño a nado’ dende a piscina muncipal

Si o ano pasado a proposta era nadar a distancia que separa Porriño de Santiago de Compostela, coma se dunha peregrinaxe se tratase, nesta ocasión a Concellería de Deportes, que dirixe M. Alejandro, presenta un novo percorrido: Porriño a nado. O reto que se establece agora é facer nadando na piscina municipal un percorrido polas oito parroquias do municipio completando un total de 44,13 quilómetros, repartidos en oito etapas.

Para iso, todas as persoas interesadas en participar terán como prazo desde hoxe e ata o 29 de setembro (Festa do Cristo) para completar a ruta. Pódese realizar de xeito individual ou en grupo (máximo de 5 persoas), si se opta por esta última modalidade os quilómetros a percorrer duplícanse, tendo que facer 88,26. Para participar desta actividade só é preciso anotarse na recepción da piscina municipal e ir comunicándolle ao socorrista os metros nadados cada día pedíndolle a este que sele a credencial cada vez que se complete unha etapa; semanalmente colgaranse no taboleiro os metros actualizados de cada nadador e equipos.

Desde a Concellería de Deportes decidiuse repetir esta actividade co obxectivo de promover a práctica deportiva e a vida saudable e, sobre todo, dada a gran acolleita que tivo o ano pasado Nadando a Santiago, que rexistrou 171 participantes, dos cales 34 realizaron o percorrido de xeito individual e o resto fixérono por equipos formándose un total de 36 grupos.

As oito etapas a realizar en Porriño a nado son: Concello de Porriño – Abelenda (Pontellas) 4,91 km; Abelenda (Pontellas) – Igrexa de Chenlo 4,73 km; Igrexa de Chenlo – Capela de San Diego (Mosende) 4,43 km; Capela de San Diego – Capela Virxe Guía (Atios) 7,25 km; Capela Virxe Guía – Capela San Blas (Budiño) 5,41 km; Capela San Blas – Faro de Budiño 5,85 km; Faro de Budiño – Igrexa Atios 4,34 km e Igrexa Atios – Concello de Porriño (Casa Consistorial) 7,21 km.