O Porriño celebra o triunfo do balonmán local co equipo feminino polo quinto posto na división de honra

Recepción ao Club Balonmán Porriño

O alcalde do Concello de Porriño Nelson Santos e o concelleiro de Deportes M. Alejandro Lorenzo, recibiron esta mañá na Casa Consistorial ao primeiro persoal, corpo técnico e directiva do Club Balonmán Porriño en recoñecemento ao quinto posto conseguido na División de Honra Feminina, a mellor clasificación na historia do club e que ademais lle dá dereito a disputar a competición europea na próxima tempada.

Alcalde e concelleiro felicitáronlles polo logro alcanzado e por todo o traballo realizado durante a tempada, “un éxito froito do esforzo diario, a dedicación e a constancia, tanto das xogadoras como dos adestradores e sobre todo tamén da directiva”, sinalaba Santos remarcando a importancia da gran xestión desenvolvida pola dirección do club “a cal soubo tomar as decisións máis oportunas no momento adecuado, ciñéndose ao seu orzamento, polo que é de aplaudir tamén o feito de cumprir o labor da parte económica”. Neste sentido, o rexedor local destacou o feito de potenciar a canteira, dando paso a estas xogadoras ao primeiro equipo e que xa demostran o seu valía nas categorías inferiores, as cales reuniron tamén importantes éxitos esta tempada.

Concello e Club reiteraron os seus agradecementos de maneira mutua. O alcalde dixo ser “unha honra que levedes o nome de Porriño todo o máis alto”, pola súa banda, o presidente Fernando Godoy agradeceu a colaboración continua da Administración local destacando o seu apoio incondicional tanto ao balonmán como ao deporte en xeral aínda en tempos economicamente difíciles.

O acto de recepción finalizou coa entrega por parte do Club Balonmán Porriño ao alcalde e ao concelleiro dunha camiseta do equipo asinada e enmarcada.