Enviar a un amigo
Opinar
ImprimirO comité de Sargadelos convoca unha marcha para defender a actividade industrial
O comité de empresa de Sargadelos convocou para este sábado día 17 de maio, coincidindo coa celebración do Día das Letras Galegas, unha marcha en defensa da continuidade da actividade industrial, polo futuro da bisbarra luguesa da Mariña e pola cultura galega.
“Os traballadores queremos poñer en valor a traxectoria empresarial e cultural da fábrica de Sargadelos, que, dende o ano 1806 coa creación da siderurxia e posteriormente dunha fábrica de vaixela, foi pioneiro da industrialización da nosa Comunidade Autónoma”, expoñen nun comunicado.
Así, indican que aproveitan o día 17 de maio para convocar unha marcha, que sairá da fábrica de Cervo ás 20,30 horas acompañada polo grupo de gaitas da localidade e varias asociacións veciñais. Finalizará no conxunto histórico artístico de Sargadelos, declarado como tal en 1972 e composto pola Real Fábrica de Cerámica, o Pazo de Ibáñez, a Cada da Administración e o Paseo dos Namorados.
O comité invita a quen estea relacionado coa cultura tradicional galega e se queira sumar ás reivindicacións a facelo e a participar “activamente”. Pode facelo a título persoal tocando a gaita, a pandeireta, coa lectura dun poema ou en representación dalgunha asociación veciñal, sinala.
Á ESPERA DO XUÍZO
Os traballadores de Sargadelos están á espera de que se celebre o xuízo o 26 de xuño no Tribunal Superior de Xustiza de Galicia (TSXG) polo recurso interposto ao expediente de regulación de emprego de extinción que supuxo o despedimento de 41 persoas en Cervo e 29 en O Castro, en Sada (A Coruña).
A principios de abril, o Xulgado do Mercantil número 2 da Coruña declarou en concurso de acredores voluntario ás empresas Fábrica de Cerámica do Castro e Fábrica de Cerámica de Sargadelos, cuestión que preocupa aos traballadores porque ven “en perigo a continuidade da produción e dos postos de traballo”.
“O peche destas fábricas suporía unha gran perda”, advirten, ao referirse tanto ao aspecto económico para a bisbarra de A Mariña como para o patrimonio cultural de Galicia. Por iso, fan un chamamento á cidadanía para que participe na marcha.
