Marisa Irimia marabillou aos cativos na Biblioteca de Riveira

Máis de medio centro de pequenos e pequenas volveron encher a Biblioteca Municipal de Riveira cunha nova actividade dos Sábados de Libro. Nesta ocasión, a contacontos Marisa Irimia foi quen marabillou aos rapaces congregados co seu espectáculo “Contos de marmeleiro, anís e limón”.

Ademais, a cita contou cuns convidados de excepción, como foron membros integrantes da asociación Ambar.

A última actuación incluída nos Sábados de Libro, que promove a Concellería de Educación dentro da programación do Maio Cultural, será este vindeiro día 31 ás 12 da mañá, co espectáculo “Contacontos de libros contentos”, a cargo de Carmen Domech. Coma sempre a entrada será libre e de balde.