Simulacro de incendio no Ceip de Olveira de Riveira coordinado por Protección Civil

Protección Civil de Riveira coordinou no mediodía de hoxe un simulacro de incendio no CEIP de Olveira que se celebrou conforme á planificación prevista.

O obxectivo desta iniciativa residiu en poñer en práctica o plan de autoprotección do centro, adestrar ao persoal docente e persoal exterior con implicación neste tipo de sinistros, comprobar a capacidade de resposta dos medios que interveñen e observar os erros que se cometan para posteriormente emendalos e incluílos no plan de autoprotección.

No desenvolvemento do simulacro partiuse dunha suposta alarma de incendio nunha estancia baldeira do inmoble. O exercicio constou da evacuación total e correcta do centro, o control dos usuarios e persoal desaloxado no exterior, e a valoración dos tempos de evacuación e de resposta de medios externos.

Ademais do propio corpo docente e alumnado do CEIP de Olveira, participaron no dispositivo Policía Local, Policía Nacional, Protección Civil, Bombeiros e unha ambulancia de Ambunova.