O Porriño acolle a exposición das 42 fotografías participantes no certame “Viaxando”

O centro cultural municipal de Porriño acolle un ano máis a exposición de fotografía Viaxando, que como vén sendo habitual nos últimos anos chega á vila do Louro por estas datas para quedar unhas semanas e poder ser visitada por todos os veciños e aquelas persoas interesadas na temática.

A mostra itinerante recolle os traballos presentados ao certame de fotografía do mesmo nome e cuxa temática responde ao propio título de Viaxando. Nesta ocasión participaron un total de 42 mozos, de entre 12 e 30 anos, resultando gañadora a fotografía titulada “Mausoleo ho chi minh, hanoi”. 

Esta xa é a sétima edición do concurso Viaxando organizado pola OMIX dos concellos de Porriño, O Rosal, Tomiño, A Guarda, Baiona, Salceda de Caselas, Gondomar e o Espazo Xove de Tui.

A exposición permanecerá en Porriño até o 27 marzo e continuará o seu percorrido nos próximos meses polo resto de municipios organizadores.