O Concello do Porriño recibirá o premio Galicia Saudable nos galardóns do Deporte Galego 2013

O Concello de Porriño foi informado de que lle será entregado o Premio Galicia Saudable á entidade de carácter público destacada no fomento e na promoción da actividade física e hábitos de vida activa. Así o determinou o xurado dos Premios do Deporte Galego 2013 reunido esta semana co obxectivo de fallar os deportistas e as entidades merecedores nesta edición destes galardóns anuais cos que a Xunta de Galicia recoñece a aqueles axentes que nos últimos doce meses destacaron de modo especial na súa contribución ao deporte galego.

Afiánzase e corrobora así a lema “O Porriño, ou Concello do deporte” que responde, á vez, a todo o traballo que se está desenvolvendo desde o Concello en prol do deporte, “un premio que sen o labor de todos os clubs e deportistas non se conseguiu, por iso é polo que llo dediquemos a todos eles, a aquelas persoas que practican algún deporte e que traballan a diario por manter a actividade deportiva no noso municipio”, asegura o alcalde Nelson Santos.

O rexedor local acudirá xunto co concelleiro de Deportes, M. Alejandro Lorenzo, ao acto de entrega dos premios que se celebrará o vindeiro xoves, 20 de marzo, ás 19.00 horas na Cidade da Cultura de Galicia, en Santiago, e que estará presidido polo titular da Xunta, Alberto Núñez Feijóo.

O concelleiro de Deportes asegura, pola súa banda, que “este premio foi o resultado do traballo conxunto dos integrantes de todos os equipos de Porriño -desde directiva a xogadores- e do Concello, incluíndose aquí ao Servizo de Deportes á fronte do que están persoas como Xullo Bernárdez e José Antonio González, que levan moitísimos anos traballando neste departamento municipal”. Son moitas as accións levadas a cabo pola Administración local en prol do deporte no municipio, desde as achegas económicas directas a todos os clubs até o mantemento, renovación e creación de instalacións deportivas, apoiando e promovendo sempre todos os eventos deportivos, abarcando múltiples modalidades: balonmán, baloncesto, fútbol, patinaxe, ciclismo, atletismo (dúatlon e tríatlon), kung fu, ximnasia rítmica, motociclismo, colombofilia e aeromodelismo, entre outros.