Máis de 100 veterinarios especialistas en vacún analizan en GandAgro aspectos de actualidade do seu traballo

Primeira poñencia de GandAgro

Máis de 100 veterinarios especialistas en vacún reuníronse esta mañá no III Monográfico da Gandería e a Agricultura, GandAgro 2014, o cal se celebra dende hoxe e ata o sábado na Feira Internacional de Galicia, para analizar temas de actualidade e interese vinculados cos seus ámbitos de traballo.

Este encontro foi nunha xornada técnica orientada exclusivamente a eles  e conducida por catro recoñecidos profesionais procedentes de Cataluña, Madrid, País Vasco e Castela – A Mancha. No seu marco expuxéronse “Casos prácticos de análises de índices reprodutivos”, de man do catalán Joan Gali, do grupo técnico veterinario GTV e encargado de desenvolver o programa de xestión de granxas que empregan a maioría de veterinarios e explotacións a nivel nacional.

Tamén se tratou a “Vaca en transición: cambios metabólico e as súas consecuencias”, un dos temas máis debatidos no sector e no que máis equipos están a traballar a nivel internacional pola importancia do paso de seca a leite no rendemento dunha vaca. O encargado de facelo foi un destacado profesional na materia, o madrileño Pedro Sayalero, xefe do Departamento de Rumiantes de Nutreco.

Durante o transcurso do encontro falouse tamén sobre “A Paratuberculose e o seu control”, un tema controvertido con gran importancia nas campañas de saneamento que debullou Ramón Juste, xefe do Departamento de Sanidad Animal do Neiker, Instituto Vasco de Investigación y Desarrollo Agrario, e un dos máis reputados profesionais neste campo a nivel nacional e internacional. Ademais, o castelán manchego Luis Miguel Jiménez,  especialista da empresa Servet Talavera que desenvolve o seu traballo tanto en España e Portugal como en Sudamérica, abordou a “Xestión dos datos en calidade de leite” para a súa mellora.

Presenza expositiva de laboratorios

Os asistentes ao encontro puideron ademais coñecer as propostas de laboratorios veterinarios que forman parte dunha exposición paralela a esta xornada que tamén se manterá mañá no XVIII Monográfico de Gando Porcino. Esta mostra sitúase nun espazo anexo á sala onde se celebrou este foro profesionais e conta coa participación de importantes laboratorios de sanidade animal, como MSD Animal Health, S.P Veterinaria, Zoonort, Elanco, ReprodAction e Galeno.