23 comparsas repartirán 21.000 euros en premios no Entroido de Porriño

Un ano máis o Entroido na vila do Louro preséntase multitudinario. Pechada onte a inscrición, serán un total de 23, 13 de Porriño e 10 procedentes doutros municipios, as comparsas que participen nos diferentes desfiles que encherán de cor todos os recunchos das rúas do centro urbano durante os próximos días. Serán unhas 1.500 persoas as que integren as 17 comparsas de categoría adulto e as 6 infantís, sumándose á comitiva tamén a Rondalla Santa Eulalia de Atios.

Ademais dos diferentes desfiles, a programación do entroido 2014 contén outras actividades, como o popular Xogo dá Onda, bailes de disfraces, animación de rúa, o enterro da sardiña ou a lectura do pregón, que foron presentadas esta mañá polo alcalde Nelson Santos e o concelleiro de Festexos, M. Alejandro Lorenzo, acompañados de Anxos Fernández Lorenzo, máis coñecida como Xeles, e que foi a elixida este ano para ser a pregoeira destas festas que darán comezo o sábado día 1 prolongándose até o vindeiro sábado, día 8, coa celebración do enterro da sardiña na xornada bautizada como “Sábado de piñata” e que traerá consigo múltiples sorpresas.

“O Entroido deste ano será lembrado polo máis austero, aínda que iso non supoña unha falta de calidade na programación”, sinalaba Lorenzo á vez que destacaba, un ano máis, a participación e colaboración das diferentes asociacións culturais e doutras agrupacións veciñais. “De novo prevese bater marca de participación e tamén afluencia de público”, aseguraba o concelleiro. Precisamente a participación é o que se premia nestas festas, “pois non hai premio para os mellores, senón para todos aqueles que participen, o premio é á participación”. Así, as 23 comparsas repartiranse entre elas 21.000 euros, unha cantidade que variará en cada caso, entre os 300 e os 1.050 euros, en función do número de integrantes e tamén polo feito de presentar ou non coplas.

O alcalde Nelson Santos cualificou á pregoeira como “unha persoa moi involucrada na vida social de Porriño; filla de dona Veli, coñecida pola súa profesión de mestra e por ser alcaldesa deste pobo”, así mesmo o rexedor local sinalou tamén o feito de “que Xeles sexa unha muller emprendedora”, referíndose a que herdou un negocio téxtil e rexentouno durante anos. Pola súa banda, Xeles, que non quixo adiantar nada do pregón, asegurou “estar moi orgullosa de ser a pregoeira destas festas e ver o ben que llo pasa todo o mundo”.

Sábado: lectura do pregón, 71º Xogo da Onda e primeiro gran desfile

Desde as 12.00 horas xa haberá animación de rúa na praza Arquitecto Antonio Palacios, onde ás 14.00 horas terá lugar a tradicional comida de Entroido.

Ás 16.00 celebrarase o Xogo dá Onda, unha cita ineludible no entroido porriñés, que este ano chega ao seu 71 edición.

O pregón está previsto para as 17.30 horas e ás 18.00 horas será o primeiro gran desfile de comparsas que sairá do polideportivo municipal e percorrerá todas as rúas da vila do Louro (Antonio Palacios, Domingo Bo, Praza de San Sebastián e Praza Central) até chegar á praza Arquitecto Antonio Palacios, onde se procederá á lectura das coplas infantís.

Domingo e luns de bailes para pequenos e maiores

O programa para a xornada dominical dará comezo a partir das 10.00 horas coa celebración da VIII Interrunning na que este ano se outorgará premio ao mellor atleta disfrazado. Pola tarde, ás 17.00 horas haberá unha festa infantil no Círculo Recreativo Cultural, con entrada libre e gratuíta.

O luns haberá animación de rúa na praza Arquitecto Antonio Palacios en horario de mañá e tarde e ademais, a partir das 17.00 horas, celebrarase un baile de disfraces no Centro Sociocomunitario coa actuación dun dúo musical.

Martes de Entroido: segundo gran desfile e animación de rúa

De novo o martes a praza Arquitecto Antonio Palacios acollerá pola mañá e pola tarde diversas actividades e espectáculos de animación de rúa. Será a partir das 18.30 cando se celebre o segundo gran desfile de comparsas que sairá da praza de San Sebastián finalizando diante da Casa Consistorial, momento no que se lerán as coplas de adultos.

Durante o tradicional mércores de cinza haberá de novo animación de rúa.

Sábado de piñata

Como broche final ás festas de Entroido celebrarase o popular enterro da sardiña que traerá consigo múltiples sorpresas. Será o sábado día 8, a partir das 17.00 horas, cando de comezo o velorio no Círculo Recreativo Cultural, iniciándose a comitiva fúnebre ás 19.00 horas en cálea Domingo Bo pasando polo barrio de San Sebastián e até Arquitecto Antonio Palacios. Unha vez diante da Casa Consistorial procederase á lectura do Testamento e finalmente leranse as últimas vontades na Ponche do Valo.