A Gala do Ciclismo Galego distingue ao Concello de Riveira pola súa colaboración na Volta á provincia da Coruña

Entrega do premio ao Concello de Riveira

A pasada fin de semana tivo lugar a Gala do Ciclismo Galego: un evento organizado pola Federación Galega de Clicismo no Auditorio Reveriano Soutollo, na localidade de Ponteareas, co obxecto de recoñecer aos ciclistas e outros axentes (entidades, colaboradores, etc…) máis destacados no ano 2013.

No transcurso desta cita, o Concello de Riveira foi recoñecido na súa calidade de entidade colaboradora no desenvolvemento da XII Volta á Provincia da Coruña, que tivo lugar entre o 24 e o 26 de maio de 2013 e concluíu precisamente na cidade riveirense con victoria final de José Antonio de Segovia.

O concelleiro de Deportes, Juan Luis Martínez, foi o encargado de recoller o diploma acreditativo deste distinción.

Ademais, o certame agasallou, entre outros, aos catro galegos que militan no pelotón profesional (Álex Marque, Gustavo César Veloso, Delio Fernández e Pablo Torres), así como a Horacio Barros, Luis López “Zurdo”, Nemesio López, Gerardo Álvarez, Victor Reguera y José Otero como recoñecemento polas súa dilatadas trayectorias.

O acto contou coa presenza do presidente da Federación Galega de Ciclismo, Manuel Tallón, a subdirectora de Programas Deportivos da Secretaría Xeral para o Deporte, Laura Mosquera, e o alcalde de Ponteareas,  Salvador González.