Bazar, A Bandeira e Escuadro terán melloras no seus camiños

O anteproxecto de mellora en varos camiños do rural silledense foi aprobado en Xunta de Goberno Local, e establece a mellora de camiños en tres localidades: na  Bandeira, Bazar e Escuadro. O orzamento total dos traballos propostos ascende a 90.848,46 euros, cantidade que lle foi outorgada ao municipio a través do Plan de Desenvolvemento Rural (PDR) de Galicia 2007-2013, con cargo ao Fondo Europeo (Feder).

Nas tres obras actuarase dotando os viais con aglomerado en quente, renovando a calzada. No caso da Bandeira, a actuación prevista pasa pola mellora do tramo que vai dende as inmediacións do centro de saúde da localidade ata a rúa da Empanada. O tramo, de 185 metros de lonxitude, contará con novo aglomerado. Prevese investir neste tramo 9.002,10 euros.

Na parroquia de Escuadro, o anteproxecto contempa o arranxo dun tramo situado no lugar de Outeiro, que tamén presenta grandes deficiencias. Neste caso actuarase sobre un camiño de 600 metros de lonxitude. O custe desta actuación é de 17.655 euros.

No caso de Bazar, actuarase  nun tramo maior, de 1.200 metros de lonxitude, que vai dende o lugar coñecido como Agro de Bazar ata preto da capela de San Caetano.  A actuación é a máis costosa das tres, debido ás características e lonxitude do tramo, con 35.310 euros.