Máis de 30 rapaces aprenderon os segredos da boa cociña nunha ximcana dos alimentos que visitou Riveira

Ximcana no local social das amas de casa

Un total de 34 nenos con idades comprendidas entre os 4 e os 12 anos participaron na tarde de onte nunha divertida Ximcana dos Alimentos e do Consumo que tivo por obxectivo ir aprendéndolles aos pequenos os segredos da arte culinaria. Esta iniciativa estivo promovida polas asociacións Arrecó, Aires de Dorna e Amas de Casa de Riveira no marco da programación do Xuño da Cultura e as Artes.

Divididos en tres grupos (cos televisivos nomes de “Pesadilla en la Cocina”, “Masterchef” e “Larpeiros”), os pequenos comezaron a actividade ás cinco da tarde na praza do Concello, lugar onde confeccionaron coa axuda dos monitores uns vistosos mandís para poñerse mans a obra.

A continuación tivo lugar a Ximcana en si, que percorreu distintos espazos públicos da cidade (a rúa de Galicia, a praza do Centenario…), onde os nenos se viron sometidos a unha serie de probas (pintarse os labios, baixar por un tobogán…) e adiviñas relacionadas coa cociña co fin de gañar diñeiro virtual, todo isto  cantando e interactuando cos viandantes.

Chegadas as seis e media, cada grupo visitou un supermercado de Santa Uxía para mercar os ingredientes necesarios para realizar os tres pratos que se ían preparar a continuación: entremeses salgados, minipizzas e un festival de froitas.

E por fin chegou o turno de elaborar o menú da man dunha experta cociñeira no local social da Asociación de Amas de Casa: emprazamento onde os cativos deron conta dos pratos obtidos nunha cuchipanda que se prolongou ata case as nove da noite.