299 deportistas con discapacidade intelectual participarán en Riveira nos xogos autonómicos de atletismo

Presentación dos xogos Special Olympics

O Complexo Polideportivo da Fieiteria vai dar cabida este sábado día 15 á celebración dos 14º Xogos Autonómicos de Atletismo de Special Olympics, entidade dedicada á promoción das persoas con discapacidade a través do deporte e o ocio.

Para explicar os detalles do evento compareceron no Consistorio de Riveira o concelleiro de Deportes Juan Luis Martínez; o presidente de Special Olympics Galicia, Eladio Fernández; e a presidenta de Amicos, Esther Vidal (tamén estiveron presentes outros membros da directiva de Amicos e o concelleiro de Turismo Anxo Orellán).

Na cita de pasado mañá tomarán parte 299 deportistas con discapacidade intelectual de 18 asociacións de toda Galicia, que estarán acompañados de 61 adestradores.En total, Riveira collerá a 374 persoas entre atletas, adestradores, voluntarios e integrantes da organización.

Os xogos seguirán as regras básicas dos eventos deportivos organizados por Special Olympics, establecéndose tres niveis de participación en función dos coñecementos que os deportistas teñen das regras así como das súas capacidades físicas. Os atletas competirán nas probas de velocidade, medio fondo, fondo, salto de lonxitude, salto de altura, lanzamento de peso, marcha, marcha asistida ou lanzamento de bola (softball), entre outras.

Inauguración

A inauguración oficial terá lugar ás 10.45 horas e contará coa participación do alcalde Manuel Ruiz e de directivos de Amicos, Fademga, Feaps Galicia e Special Olympics. O inicio da competición está programado para as 12 do mediodía.

A celebración destes Xogos segue o cerimonial das celebración das Olimpíadas. Os deportistas das 18 asociacións participantes desfilarán entre os presentes e, posteriormente, un deportista da Asociación Amicos lerá o lema dos deportistas de Special Olympics: “Quero gañar, máis se non o acado, deixádeme ser valente no intento”.

Finalizados os xogos (prevese que o acto de clausura teña lugar ás 19 horas) levarase a cabo a entrega do Premio ás Boas Prácticas no Deporte, destinado a enxalzar o comportamento daquela entidade que destaque pola súa deportividade e respecto ás normas e aos seus compañeiros.

Juan Luis Martínez fixo, quen salientou o compromiso do Concello coas persoas con diversidade funcional e co deporte adaptado, fixo un chamamento á cidadanía para que o sábado encha de colorido o complexo de A Fieiteira.