A Deputación saca a licitación as obras de ampliación do último quilómetro da estrada de Espiñeirido

Estado actual da estrada

O Boletín Oficial da Provincia anuncia no día de hoxe a contratación por parte da Deputación das obras de ampliación e mellora do trazado da estrada provincial DP 7103 Laranga (en Porto do Son) a Olveira (en Riveira) comprendida entre os puntos quilométricos 6.224 e 7.230, que se corresponden na súa maior parte co tramo do citado vial situado no municipio riveirense (caso do lugar de Espiñeirido).

Cabe recordar que a institución provincial xa licitara con anterioridade (2011) os 6 primeiros quilómetros da citada estrada, todos eles situados no municipio de Porto do Son, obra que fora adxudicada por un millón de euros e está actualmente en execución.

A nova actuación ten un orzamento de 298.756,79 euros (IVE incluído) e un prazo de execución de 6 meses.

O procedemento de contratación é aberto cun único criterio de valoración. O prazo de presentación de ofertas é de 13 días naturais contados a partir de mañá.