Máis do 63% das confrarías de pescadores revalidan no seu posto aos seus patróns maiores

Un total de 40 patróns/as maiores das confrarías galegas renovaron o seu cargo tralas eleccións realizadas ás confrarías de Galicia o pasado 29 de setembro, nas que as 63 confrarías votaron nun proceso electoral único e simultáneo para elixir aos seus representantes. Hoxe foron proclamados definitivamente os patróns/oas maiores elixidos nas 63 confrarías e o seguinte paso será o da toma de posesión, que se celebrará este venres 26 de outubro.

Un total de 23 novos rostros poranse á fronte das confrarías de Galicia, mentres que o resto revalidan o seu cargo. En total 6 son mulleres e 5 delas repiten responsabilidade. A duración do mandato do patrón/a maior e do resto dos órganos das confrarías –xunta xeral e cabido- será de catro anos, podendo ser reelixidos por períodos de igual duración.

Desenvolvemento do proceso

Todos os pasos do desenvolvemento do proceso electoral veñen explicados na normativa de convocatoria de eleccións e que regula todo o proceso electoral nas confrarías de pescadores. Tal e como establece esta normativa, os comicios desenvólvense en tres partes.

En primeiro lugar realizáronse as eleccións nas confrarías de pescadores de Galicia. Nesta parte, unha vez proclamados de xeito definitivo os vogais da xunta xeral de cada confraría, tomaron posesión dos seus cargos na súa sesión constitutiva. Neste primeiro pleno da sesión constitutiva da xunta xeral, realizouse o procedemento para elixir ao patrón/oa maior, vicepatróns/oas maiores e vogais do cabido. Hoxe foron proclamados definitivamente os 63 patróns/oas maiores das confrarías e este venres, 26 de outubro tomarán posesión. O seguinte paso é a celebración das votacións nas tres federacións provinciais e finalmente elixirase ao presidente da Federación Galega de Confrarías de Galicia.