O garda civil que disparou ao bateria de Los Piratas declara como imputado por homicidio imprudente

O axente da Garda Civil que, o pasado 26 de agosto, disparou ao batería de Los Piratas, e causoulle a morte, declarará este venres ás 9,30 horas no Xulgado de Instrución número 2 de Ponteareas (Pontevedra), en calidade de imputado por un suposto delito de homicidio imprudente.

Segundo confirmaron fontes xurídicas, o axente foi chamado a declarar pola xuíza, que xa escoitou as versións de varias testemuñas do acontecido na vivenda do músico.

Así, polo xulgado de Ponteareas xa pasaron a viúva de Javier Fernández, un dos seus amigos, persoal sanitario, veciños e outro dos axentes da Benemérita que participou na intervención no domicilio familiar da vítima.

A familia do músico está comparecida na causa como parte prexudicada, aínda que non descarta, en función de como se desenvolva a instrución e das dilixencias que se practiquen, exercer a acusación particular.

Por outra banda, a Fiscalía solicitou a realización de varias dilixencias, aínda que fontes xudiciais precisaron que, entre estas, non están informes psicolóxicos ou psiquiátricos do axente imputado. As mesmas fontes tamén aclararon, en contra do que a familia sostiña nun principio, que ao falecido non se lle retirara o tratamento pola súa enfermidade (trastorno bipolar), senón que se lle reducira a medicación.

VERSIÓNS CONTRADITORIAS

A morte de Javier Fernández estivo rodeada de polémica dende o primeiro momento, xa que a familia e a Garda Civil manteñen versións contraditorias sobre o acontecido.

Mentres que o Instituto Armado informou no seu día de que a intervención na vivenda se levou a cabo por un suposto delito de violencia de xénero, a muller do batería negou en todo momento que fose vítima de malos tratos, e ratificou ante o xulgado que ese día o o seu marido se comportou de forma violenta porque tiña unha crise derivada da retirada da medicación para a súa enfermidade psiquiátrica.

Segundo a Garda Civil, Javier comportouse de forma moi agresiva e atacou un dos axentes que estaba no seu domicilio. Ante a persistencia da súa actitude, e sempre segundo a versión ofrecida pola Benemérita, o outro garda viuse obrigado a realizar un disparo intimidatorio que, desafortunadamente, lle alcanzou no abdome, causándolle a morte pouco despois.

Non obstante, a súa viúva e os seus amigos sosteñen que pediron axuda porque o falecido tiña un brote psicótico, e que en todo momento se advertiu aos axentes e aos sanitarios desprazados á vivenda que o músico era un enfermo mental. A muller negou, así mesmo, que a tivese retida ou que correse perigo ela ou o seu bebé de poucos meses.

Así mesmo, a familia expresou as súas sospeitas, á vista dos datos que se revelan na instrución, de que a actuación do garda civil que disparou puido ser “desproporcionada”. Mesmo chegaron a insinuar que os axentes “parece que tiñan interese” en facer pasar este caso por un suposto de malos tratos.