O alcalde de Ribadeo considera que o plan da Praia das Catedrais non funcionará

O alcalde de Ribadeo (Lugo), o nacionalista Fernando Suárez, criticou este martes a “torpeza e miopía” da Xunta co plan de Protección da praia das Catedrais, polo que hai que reservar praza para visitar o areal, e considera que “non vai funcionar” por empezar o 1 de xullo.

“Non é unha cuestión de capricho, é un cuestión de sentido común, de supervivencia económica para o sector servizos e de conservación ambiental para o que é o areal e o seu ámbito”, lamentou o rexedor. Ademais, acusou á Xunta de “torpeza” ao interpretar que “empeza a casa polo tellado”. “E, ademais, faino experimentando, porque facelo en plena tempada alta e a partir do 1 de xullo é unha torpeza maiúscula e non vai funcionar”, apostilou.

Fernando Suárez admitiu que o que lle “preocupa” é “a mala imaxe que se pode dar ao mundo”. “Porque aquí o que facemos non é en clave comarcal é en clave internacional”, engadiu.

“É DO MÁIS INTERNACIONAL DE GALICIA”

“A praia das Catedrais é do máis internacional que ten Galicia. É unha torpeza actuar deste xeito, tan torpe, tan miope que ten a Xunta de Galicia”, insistiu o rexedor. Tamén considerou que con esta actitude do Goberno galego se quere “molestar” un alcalde, neste caso do BNG, polo feito, segundo subliñou, de “non ser da súa cor política”.