O PSOE de Miño esixe a dimisión do alcalde Ricardo Sánchez

O voceiro do Grupo Municipal Socialista no Concello de Miño, Manuel Vázquez Faraldo, esixiu a dimisión do alcalde, Ricardo Sánchez, de Compromiso por Galicia (CXG), despois de que este -o único edil que conseguiu esta formación- obtivese a Alcaldía co apoio dos seis concelleiros do PP. En declaracións, Faraldo considerou que, na investidura da nova Corporación municipal, “quedou clara a existencia dun pacto”, sinalou ao denunciar un acordo entre o PP e CxG, que dende a formación escindida do BNG negan.

“Non hai ningún acordo co PP e non queda outra que negociar co PSOE”, sinalaron dende o partido. Non obstante, Manuel Vázquez Faraldo rexeita estas afirmacións e alega que “se non hai pacto”, o alcalde “debe dimitir” para proceder á elección dun novo rexedor, cargo que reivindicou para os socialistas “como forza máis votada”.

Ao respecto, preguntouse como o único representante de Compromiso por Galicia “vai gobernar en solitario”. “Non pode pretender que nos sumemos a iso”, dixo tras a votación deste sábado e que obrigou o novo alcalde a saír escoltado da Casa do concello.

POSIBLES CONTACTOS

Preguntado se estarían dispostos a manter contactos coa formación nacionalista, opción que formulan como necesaria dende CxG, dixo que os socialistas “sempre estamos dispostos a dialogar, pero dende a posición que nos corresponde como forza mais votada”, recalcou.

Ao respecto, reivindicou para o PSOE a Alcaldía. “Correspóndeme esa responsabilidade e falar con todas as forzas”, sentenciou. Non obstante, precisou que, previamente, é necesario que o alcalde dimita. “E se non o fai, manterémonos na oposición”, apostilou.