Enviar a un amigo
Opinar
ImprimirMáis que comercio! elixe a Calzados Gayoso como o establecemento favorito en Sarria
Raquel Arias entrega o diploma aos responsables do comercio
A delegada territorial da Xunta, Raquel Arias, entregou hoxe os premios principais da campaña Máis que comercio! desenvolvida pola Consellería de Economía e Industria en Sarria durante o mes de xullo. Arias fixo entrega a Calzados Gayoso do diploma que o acredita como o establecemento favorito dos consumidores, e dos tres cheques –un por valor de 200 euros e dous por valor de 100 euros- ás tres compradoras gañadoras.
A delegada destacou o interese que espertou na localidade esta iniciativa da Dirección Xeral de Comercio, xa que a web habilitada para a participación recibiu máis de 11.200 chamadas de usuarios dos 81 comercios que se sumaron á campaña.
Os consumidores recibían por cada 5 euros de compra un boleto de participación, e introducindo o código na web www.maisquecomercio.com podían votar ao seu comercio favorito ao tempo que optaban a un dos 161 premios que achegaron a Xunta, o Centro Comercial Aberto e establecementos participantes.
O establecemento máis votado en Sarria foi Calzados Gayoso, unha firma que leva implantada na localidade dende os anos 50 e que na actualidade vende calzado de todo tipo e para todas as idades.
Raquel Arias explicou que esta campaña, que está a percorrer Galicia durante todo o ano, ten por obxectivo “resaltar os valores do comercio de proximidade, como son a calidade, o trato ao cliente ou a variedade, ademais de resaltar o traballo dos centros comerciais abertos para mellorar a competitividade do pequeno comercio”.
Ao respecto, lembrou que o impulso ao asociacionismo é un dos eixos da estratexia específica da Consellería de Economía e Industria de apoio ao pequeno e mediano comercio, dentro da cal se inclúe o programa de axudas ás asociacións de comerciantes para a dinamización dos centros comerciais abertos e prazas de abastos, nas cales o Centro Comercial Aberto de Sarria recibiu máis de 22.000 euros e preto de 3.000 euros a asociación da praza de abastos.
