A D.O. Monterrei alcanza os seus máximos de crecemento en 2014
Deste xeito rexistrouse un aumento de 285.000 contraetiquetas emitidas polo Consello Regulador no segundo trimestre do ano respecto dos datos de 2013, o que supón un crecemento do 60% neste período e fai prever un salto cuantitativo nas cifras anuais de viño cualificado na Denominación de Orixe.
O crecemento parece ser xa unha tendencia na denominación, pois ademais de mellorar as cifras respecto de exercicios anteriores, manifesta crecementos á alza entre trimestres do mesmo ano. Así, en 2014 Monterrei arrinca cun aumento das cifras de comercialización do 25% no primeiro trimestre, pasando a un 60% no segundo (todo iso respecto dos datos de 2013).
Nunha comparativa anual, a primeira metade de 2013 supuxo en Monterrei a comercialización de 913.000 botellas fronte a 1.300.000 botellas en 2014, o que supón un incremento de case 400.000 botellas.
Este é sen dúbida un dato positivo para Monterrei e evidencia unha evolución manifesta, grazas ao incremento das cotas de mercado e notoriedade de marca da D.O.