Ordes estrea App

O Concello de Ordes vén de estrear a súa nova App para teléfonos móbiles. Trátase dunha ferramenta que se caracteriza pola súa funcionalidade, facilidade de manexo, e por un atractivo deseño visual baseado en fotografías de gran calidade. Para localizala basta con teclear o nome do Concello nas plataformas habituais de busca para acceder directamente a ela.

Dispón dun apartado de incidencias onde cada persoa pode comunicar calquera aspecto que considere necesario, o cal se pode complementar de xeito particular engadíndolle fotografías e emprazamentos para a súa fácil localización. Tamén permite o envío de consultas e a recepción de avisos de todo tipo por parte do Concello mediante notificacións push, ademais de poder acceder directamente á información relacionada co municipio e as parroquias que o compoñen. Seguindo co eido da información cada día publicaranse as últimas novas relativas ao Concello de Ordes e permite escoitar en directo Radio Ordes.

Na sección turística visitantes, veciños e veciñas poderán atopar resposta a cuestións sobre hostalaría e restauración; hostais, hoteis e residencias; rutas e camiños, aspectos culturais como DesOrdes Creativas; ou mesmamente o Camiño Inglés. Por outra banda, a axenda permite consultar todos os actos e citas importantes de diverso tipo que se dean no termo municipal, coa posibilidade de integralos moi sinxelamente nas súas axendas persoais dixitais. Tamén se presentan os datos meteorolóxicos da xornada vixente.

Tamén se pode ter acceso a un amplo directorio telefónico, de enderezos e localizacións de servizos, corpos de seguridade, sanitarios etc. Horarios de autobuses, necrolóxicas e mesmamente as farmacias e servizos de garda están xa ao alcance no seu móbil.

Esta práctica aplicación xa está dispoñible para tecnoloxía Android e en cuestión de poucos días tamén para o sistema IOS e está financiada integramente pola Deputación da Coruña.