Suárez considera importante ter un candidato para a coalición de En Marea

O alcalde de Ferrol, Jorge Suárez, falou este martes sobre a “importancia” de designar “canto antes” ao candidato que liderará a coalición de En Marea nas próximas eleccións galegas que se celebraran no outono.

Neste sentido, Suárez afirmou que ao longo deste mes de xullo debería haber un nome “sobre a mesa” para que en agosto estea designada esa persoa de referencia que liderará a formación.

No entanto, o rexedor ferrolán matizou que os alcaldes das mareas nas cidades galegas van actuar co “máximo respecto”, sen pór “vetos nin límites”, co obxectivo de conseguir que “todas as comunicacións sexan en positivo” de cara á construción “dunha candidatura fiable”.

Ademais, segundo desvelou Suárez, os tres alcaldes están a marcar os detalles para unha nova reunión que podería ter lugar este xoves. Para iso, manterán reunións bilaterais con todas as partes que conforman En Marea e todas aquelas que poderían incorporarse.

Segundo expresou Jorge Suárez, a preparación faise “tendo en mente” que, este mes de xullo, “ten que ter lugar a asemblea na que En Marea ampliará a súa base, se democratice” e “todos” sentan “partes iguais dun proceso”.

CRISE EN PODEMOS GALICIA

Tras a aprobación o pasado xoves no Consello Cidadán de Podemos Galicia do texto que apoia a confluencia de cara ás galegas -sen contar co voto da secretaria xeral-, a sucesión de acontecementos internos ao redor da cúpula de Podemos Galicia fixo pensar nunha posible crise interna na formación morada.

Preguntado por este asunto, desde o concello de Ferrol, Jorge Suárez, mostrou un “profundo respecto” por Santos, da que cre que “vai ter a responsabilidade de sumar e non chegará a posicións de parte que entorpezan o proceso.

POSIBILIDADE DE ACORDO

Finalmente, Suárez destacou que “chegar ao consenso vai ser fácil entre todos”, e volveu facer referencia á importancia da celebración dunhas primarias xa que, segundo manifestou, “ese consenso debe ser ratificado”.

Así mesmo, apuntou que a posición que mantén Carmen Santos respecto ao proceso é “compatible” coa que propoñen os tres alcaldes das mareas. “Seremos os integrantes da Asemblea os que nos poñamos de acordo e non creo que sexa complicado porque todos temos claro o obxectivo final”, engadiu.