Unha testemuña contradí a coartada de Basterra á par que os axentes inciden nos comportamentos estraños dos pais

Declaración dunha das testemuñas

O testemuño sereno e firme dunha moza que afirma, sen xénero de dúbidas, que viu a Alfonso Basterra en compañía da súa filla Asunta por unha rúa do centro de Santiago na tarde que desapareceu perfílase polo momento como a maior oposición á versión ofrecida polo pai, que mantén que permaneceu no seu domicilio toda a tarde do día en que morreu a menor.

A testemuña, antiga compañeira de Asunta na súa clase de francés, compareceu este luns na quinta sesión do xuízo pola morte da nena, onde testemuñas e policías apuntaron datos sobre o comportamento estraño dos pais e na que Alfonso Basterra sufriu unha chamada á orde polo seu comportamento.

Aínda que a actitude do acusado da morte de Asunta foi, ao igual que en xornadas anteriores, altiva e arrogante durante toda a sesión, foi especialmente patente no momento no que un dos axentes que participaron nas primeiras horas da investigación contaba que, segundo o seu punto de vista, o corpo da nena non era visible na pista forestal a menos que se iluminase con luz artificial.

A súa actitude neste punto levou o presidente do tribunal, Jorge Cid Carballo, a “chamalo á orde” por primeira vez, recordándolle ao pai da vítima que non vai permitir que estea a “facer xestos de desaprobación durante todo o xuízo”.

A nai de Asunta, que acudiu ao igual que Basterra unha xornada máis de rigoroso negro ao xuízo, permaneceu toda a sesión con xesto afectado e chorou en numerosas ocasións.

UNHA TESTEMUÑA SITÚAO NA RÚA

O principal testemuño que este luns foi en contra da versión dos pais foi o dunha antiga compañeira de clase de Asunta, que afirmou ante o xurado estar “segura” de que viu a Basterra en compañía da nena en Santiago a tarde na que morreu a menor, na que o acusado mantén que quedou na casa.

“Estou segura de que eran eles”, apuntou en referencia a Alfonso e Asunta a moza, que tardou tres meses en dar esta información á Policía nun primeiro momento porque creu que non tiña relevancia e, unha vez que coñeceu a versión do pai, por consello da súa nai, que intentaba “non meter” a súa filla no caso.

A testemuña foi moi clara en afirmar sen xénero de dúbidas que eran Asunta e o seu pai as persoas coas que se cruzou o día 21, entre as 17,00 e as 19,00 horas, na intersección entre Xeneral Pardiñas e República do Salvador. O momento concreto fíxao un ticket de compra dunhas zapatillas deportivas que adquiriu xunto co seu noivo inmediatamente antes de atopalos e que marca as 18.21 horas.

A avogada de Alfonso Basterra, Belén Hospido, incidiu no feito de que a cámara dunha gasolineira na saída de Santiago gravou precisamente a Rosario Porto, supostamente en compañía de Asunta, a esa mesma hora. Así, puxo en dúbida que a nena puidese viaxar este traxecto neses minutos. Non obstante, a moza non precisou se a hora que reflicte o ticket era a real e indicou que o encontro se produciu entre as 17.00 e as 19.00 horas.

Esta versión iría en contra do declarado por Alfonso Basterra e apoiaría a tese dos investigadores, que consideran que Rosario Porto recolleu precisamente a ambos os dous na rúa nese momento para dirixirse á súa vivenda de Montouto.

COMPORTAMENTOS ESTRAÑOS

A maiores, varias das testemuñas que declararon este luns apuntaron a comportamentos estraños dos pais nos días nos que se produciu a morte da nena.

Así, o axente da Policía Nacional da Comisaría de Santiago que recolleu a denuncia da desaparición de Asunta o 21 de setembro de 2013 posta polos seus pais adoptivos estrañouse de que Alfonso Basterra augurase que a nena de 12 anos “ía aparecer morta” cando transcorreran apenas en torno a tres horas dende que compareceran en dependencias policiais. Ademais, o acusado díxolle que “o único que el quería é que non fose agredida sexualmente”.

Varios axentes incidiron tamén no feito de que, ao desprazarse esa noite ao piso do pai, observaron que non había nada disposto para cear nin comida preparada, a pesar de que Basterra dixo que cando saíu a poñer a denuncia esperaba á súa filla e á súa exmuller para cear.

En canto a Rosario Porto, os axentes explicaron que, antes de ser detida, a nai de Asunta non dixo en ningún momento que a nena fora con ela a Teo e que a deixara na rúa, aínda cando varios axentes lle recordaron o importante que era “non obviar ningún detalle” para resolver o caso.

Pola contra, a acusada defendeu en todo momento antes de ser detida que Asunta quedara na casa ás 19,00 horas facendo os deberes e mesmo mostrou no cuarto os libros escolares da nena “colocados en forma de abano” para evidenciar que era así como estudaba.

Un veciño da casa que Rosario Porto ten en Montouto, e na que os investigadores cren que se produciu a morte da menor, recordou que o día dos feitos lle advertiu á nai de Asunta de que “puxese as luces” cando a viu saír da vivenda preto das 21,00 horas, dado que, recordou, circulaba con elas apagadas. A testemuña describiu como “moi sufocada” e sen “ganas de falar” á muller ese día.

VISIBILIDADE DO CORPO

Un dos puntos discordantes desta sesión foi a visibilidade do corpo de Asunta na pista forestal na que foi localizada. Así, un veciño do lugar narrou que pasou ese día ata en tres ocasións entre as 23,00 horas e a media noite pola pista sen ver o corpo e sostivo que non se atopaba alí. Pola contra, dous axentes aseguraron que era “imposible” ver o corpo na zona sen luz artificial, dado que, aínda que había lúa chea, estaba á sombra dunha árbore.

Esta circunstancia estaría relacionada coa versión esgrimida polas defensas dos pais, xa que apuntan a que o corpo puido ser deixado na pista entre a media noite e a hora na que se localizou, pasadas as 1,00 horas, momentos nos que os pais estaban acompañados pola Policía.

CORDA

Nesta sesión os axentes tamén falaron da corda achada preto do corpo de Asunta e sobre o anaco atopado nunha papeleira da vivenda de Teo, que eran en aparencia, cor e forma, iguais. Un dos gardas civís apuntou en particular o brillo que tiña a corda en ambos os dous casos, así como a súa tonalidade.

Os axentes contradixeron finalmente a versión de Alfonso Basterra sobre o seu ordenador portátil, dado que explicaron que, se ben na primeira inspección non se buscou, durante o rexistro policial “non estaba” no lugar no que se atopou meses despois.