A ‘Tripla Coroa’ é un exemplo de equilibrio entre usos e conservación que engaden valor á candidatura do Parque Nacional como Patrimonio da Humanidade
A conselleira de Medio Ambiente, Territorio e Vivenda, Ángeles Vázquez, destacou esta mañá que eventos deportivos como a Tripla Coroa son un exemplo de garantía de equilibrio entre os usos e a conservación dos espazos naturais e que neste caso concreto engaden valor á candidatura da Xunta para que o Parque Nacional Marítimo- Terrestre Illas Atlánticas de Galicia sexa declarado como Patrimonio da Humanidade pola Unesco.
Así o puxo de manifesto durante a rolda de prensa de presentación da segunda edición desta proba deportiva, organizada por Atlantic Extrem Sports, que se celebrará o vindeiro 7 de setembro e na que os participantes percorrerán a nado 19 quilómetros que separan a Praia do Almacén en Sálvora ata a Praia do Confín, no concello de O Grove.
A conselleira indicou que a Tripla Coroa é moito máis que unha proba deportiva, xa que é unha mostra da compatibilidade de usos, recollidos no Plan Reitor -xa que Illas Atlánticas é un parque nacional que conta con PRUX aprobado-, e da preservación dos valores naturais que atesoura e que o avalan como parque nacional. Un aspecto que da valor á candidatura seria e rigorosa presentada pola Xunta ante o Goberno de España, engadiu a conselleira.
Salientou que a participación de nadadores procedentes de distintos puntos de España e do mundo, como Arxentina, México, Australia e Portugal, aportan proxección internacional sobre a xoia da coroa de Galicia, as Illas Atlánticas, o único Parque Nacional co que conta a Comunidade galega.
A conselleira afirmou que a proba deportiva é un escaparate tras o que se van a levar a cabo unha serie de actuacións e actividades medio ambientais, como a limpeza da Praia do Almacén, organizada baixo o lema Mollámonos polo medio ambiente, coa que impulsar unha serie de accións para promover a conservación do medio mariño e concienciar tanto a nadadores como a visitantes das necesidades de protección do medio ambiente. Tamén se celebrará un concurso de fotografía no que os participantes tomarán entre fotos da illa de Sálvora.