SmartPeme ofrece case 50 obradoiros nas sete oficinas da provincia durante este mes de marzo

As oficinas de SmartPeme na provincia de Pontevedra acollerán este mes 47 novos obradoiros ao abeiro da rede TIC impulsada pola Deputación de Pontevedra. SmartPeme ofrécelles ás persoas emprendedoras e pemes servizos de información, análise, asesoramento, capacitación, demostración, acompañamento e titorización no ámbito das TIC, sempre da man dos propios implicados e implicadas e coa colaboración das asociacións empresariais e as mozas e mozos autónomos.

As sedes de Vigo, O Porriño e Ponteareas ofrecerán en conxunto 23 obradoiros; mentres que Pontevedra suma oito, Cambados outros tantos, Lalín seis e A Estrada dous. As persoas interesadas en participar nestes obradoiros, que se celebrarán na súa práctica totalidade a partir das 19:00 horas, poderán formalizar a súa inscrición chamando ao 886202020 ou ben a través do correo electrónico info.smartpeme@depo.es ou da páxina www.smartpeme.depo.es. (O listado completo por oficinas e as datas está dispoñible máis abaixo).

O proxecto SmartPeme é un novo modelo de servizo orientado á mellora competitiva das pemes e á procura dunha melloría nas vendas e na eficacia e eficiencia das tarefas, que abre novos campos de actuación. Este proxecto desenvolverá novas carteiras de servizos. Así, ábrense tres grandes liñas como son o Centro Provincial de Economía Dixital (CPED), que estará situado no viveiro de empresas de Barro, SmartPeme Impulsa e TurisTIC, que estarán dispoñibles para as persoas autónomas e empresas nos vindeiros meses.

A través do Centro Provincial de Economía Dixital vanse dar a coñecer ás empresas as ferramentas, aplicacións e solucións innovadoras máis relevantes que a economía dixital ofrece. Para iso, o CPED vaise apoiar nas instalacións do FabLab que a Deputación de Pontevedra ten instalado no viveiro de Barro.

Doutra banda, SmartPeme Impulsa abrirá novas vías de asesoramento en materia de innovación, competitividade e internacionalización, unindo deste xeito os obxectivos das empresas coas máis novas tecnoloxías, procesos e servizos.

Finalmente, TurisTIC erixirase como o punto de apoio do sector turístico. Este servizo, enmarcado no Plan Estratéxico de Turismo Rías Baixas, pretende potenciar o sector a través de axudas ás empresas para adaptarse á contorna dixital. Adicionalmente, esta liña de SmartPeme contará con iniciativas innovadoras coma unha aceleradora para empresas TIC relacionadas co sector turístico, e un congreso sobre o impacto das novas tecnoloxías no sector.