Cen rapaces da comarca de Compostela pechan a Campaña de Esquí 2018 da Deputación

Un centenar de nenas e nenos de entre 10 e 14 anos dos concellos de Ames, A Baña, Arzúa, Boimorto, Boqueixón, Cerceda, Frades, Mesía, Negreira, Ordes, Oroso, O Pino, Rois, Santiago, Teo, Tordoia, Touro, Trazo, Val do Dubra e Vedra participaron en Cabeza de Manzaneda (Ourense) na quinta e derradeira expedición á neve da Campaña de Esquí 2018, organizada pola área de Deportes da Deputación da Coruña.

Durante esta fin de semana, os escolares destes concellos coruñeses tiveron a oportunidade de iniciarse ou perfeccionar a práctica do esquí con monitores profesionais e participar en numerosas actividades deportivas e culturais que se organizan de xeito complementario.

500 nenos da provincia aprenderon a esquiar coa Deputación

O deputado responsable de Deportes da institución provincial coruñesa, José García Liñares, subliñou a “gran aceptación” coa que contou este programa, que durante os meses de febreiro e marzo permitiu a un total de cincocentos rapaces dos 93 concellos coruñeses iniciarse ou perfeccionar a práctica do esquí.