A Policía Autonómica realiza 224 inspeccións para velar polo cumprimento da Lei de prevención de bebidas alcohólicas en menores

Axentes do grupo de Menores da Policía Autonómica levaron a cabo entre o 12 e o 18 de marzo un total de 224 inspeccións de control en 18 concellos galegos.

Por parte dos distintos grupos de Menores da Policía Autonómica da Coruña, Santiago de Compostela, Vigo, Ourense, Lugo e Pontevedra, nesta pasada semana realizáronse 48 dispositivos de control de menores en risco de desamparo (absentismo escolar e consumo de alcohol/tabaco e drogas en menores de idade), nos concellos de A Coruña, Ames, Arteixo, Cambados, Cangas, A Illa de Arousa, Lugo, Moaña, Ourense, Pereiro de Aguiar, Ribeira, San Cibrao das Viñas, Santiago de Compostela, Sarria, Teo, Tomiño,Vilagarcía de Arousa e Vigo.

Como resultado do dispositivo levado a cabo, foron identificadas 111 persoas e inspeccionadas 224 zonas de ocio, locais e centros comerciais. Levantáronse 5 actas de infracción, das cales 4 foron por venda de alcol e 1 por consumo de tabaco.

A Policía Autonómica, dende a entrada en vigor da Lei 11/2010, de prevención de bebidas alcohólicas aos menores de idade, leva a cabo diversos dispositivos policiais por toda a Comunidade Galega, para velar polo cumprimento da mesma e previr o consumo deste tipo de bebidas polos menores de idade.

Nestes dispositivos, ademais das denuncias pola infracción da Lei 11/2010, tamén se informa aos propietarios dos locais do seu contido, das actuacións que deben levar a cabo para o cumprimento da mesma e evitar o consumo de alcol entre os menores de idade, así como, que por parte da Policía Autonómica se continuará coas actividades necesarias para velar polo cumprimento da norma.