A Deputación forma ao seu funcionariado na nova Lei de Contratos do Sector Público

A Deputación da Coruña realizou esta mañá un curso dirixido ao seu funcionariado sobre a Lei 09/2017 de Contratos do Sector Público, que vén de entrar en vigor o pasado 9 de marzo e introduce importantes novidades no procedemento de contratación das Administracións Públicas.

A xornada, que foi inaugurada polo presidente da Deputación, Valentín González Formoso, e o xefe do Servizo de Patrimonio e Contratación, Luis Jaime Rodríguez, serviu para explicar e resolver dudas acerca dalgúns dos detalles que incorpora a nova lexislación no seus 347 artigos, entre elas o reforzo dos principios de publicidade e transparencia na administración, a través de cuestións como a supresión do procedemento negociado sen publicidade, a redución dos límites para acudir ao contrato menor ou a introdución dun novo procedemento aberto simplificado.

González Formoso destacou a “trascendencia” da nova Lei “a nivel xurídico, pero tamén económico, pois a contratación pública representa o 18% do Produto Interior Bruto europeo” e instou aos responsables dos diferentes servizos provinciais a continuar traballando para “mellorar a axilidade dos procesos de contratación e para que esta Deputación siga sendo unha referencia en transparencia” .