As presas de Vilagudín e San Cosmade realizarán unha proba do sistema acústico dos seus plans de emerxencia

As presas de Vilagudín e San Cosmade realizarán mañá, mércores 21 de febreiro, e pasado mañá, xoves 22 de febreiro, unha proba do sistema acústico dos seus Plans de emerxencia para avaliar o seu correcto funcionamento e para dar a coñecer o seu son á poboación do contorno: neste caso, os concellos de Cerceda, Ordes e Tordoia.

En concreto, a serea activarase o mércores e o xoves entre as 9,00 e as 18,00 horas. Trátase unicamente dunha proba, polo que non afectará aos veciños, que poderán seguir coa súa actividade diaria.

Con estas actuación búscase acadar dous obxectivos: garantir a operatividade dos sistemas e, ao mesmo temo, que a poboación das zonas afectadas sexa capaz de recoñecer o son da serea de aviso de evacuación en caso dunha emerxencia.

A proba realízase a través da colaboración de Gas Natural Fenosa, a Dirección Xeral de Emerxencias e Interior da Xunta de Galicia, e Augas de Galicia. Inscríbese no proceso de implantación dos Plans de emerxencia nas presas, en cumprimento do establecido na Planificación de Protección Civil ante risco de inundacións.

Os obxectivos dos plans de emerxencia de presas pasan por ter definidas as estratexias para facer fronte a situacións que comporten risco de rotura ou avaría grave; coñecer as zonas que quedarían anegadas en caso de rotura; e ter previstos sistemas de aviso á poboación e aos organismos xestores de emerxencia. En definitiva, trátase de estar o mellor preparados posible ante situacións que poidan comportar riscos nestas instalacións e garantir, así, a seguridade da cidadanía.