A comisión de Cooperación abordará o programa de Mocidade e o de Limpeza de redes viarias

As comisións informativas da Deputación de Ourense celebran hoxe mércores, 18 de outubro, e mañá xoves as súas reunións mensuais. Esta tarde terán lugar as de Cooperación, Infraestruturas e Medio Rural, a de Transparencia e Administración Provincial e a Comisión Especial de Contas, Facenda e Economía, mentres que o xoves desenvolveranse as comisións de Termalismo, Turismo e Medio Ambiente, a de Igualdade, Benestar e Emprego, e a de Cultura, Deportes e Mocidade.

Na Comisión de Cooperación abordarase o Programa Provincial de Cooperación cos concellos de menos de 20.000 habitantes e a entidade local menor de Berán en materia de mocidade para o próximo exercicio de 2018. O importe total deste programa é de 549.000 euros, e ten como obxectivo o financiamento das actividades que desenvolvan as citadas entidades a prol da mocidade no vindeiro ano.

Nesta comisión trataranse tamén as bases reguladoras do Programa Provincial de Cooperación cos Concellos para a limpeza das marxes das redes viarias municipais e provinciais en 2018, actuacións para as que a Deputación prevé destinar un orzamento de 350.000 euros. A institución provincial presenta este programa á valoración da comisión co fin de que os concellos e as mancomunidades podan coñecer con antelación suficiente o seu contido e planificar a súa participación no plan.

Pola súa banda, a Comisión de Transparencia e Administración Provincial dará conta da decisión xudicial pola que se anula a convocatoria e bases reguladoras do concurso ordinario para provisión de diversos postos de traballo da RPT da Deputación de Ourense, resolución xudicial que será recorrida polos servizos xurídicos da Deputación.