O Teatro Colón arranca a súa programación co concerto homenaxe á cantautora chilena Violeta Parra

O vindeiro luns 25 de setembro ás 20:30 horas dará comezo a programación propia do Teatro Colón, da que é responsábel a área de Cultura da Deputación da Coruña, cun espectáculo musical gratuíto para celebrar o centenario do nacemento da cantautora chilena Violeta Parra: Trobas a Violeta.

A conmemoración súmase ás homenaxes que se están a celebrar en todo o mundo para difundir o seu legado a través dun concerto especial de Tita Parra, neta da cantautora, arroupada por tres das voces máis representativas da troba ibérica como son Rosa Cedrón, Martirio e Uxía.

A autora de “Gracias a la vida” rescatou o folclore e renovou a poesía da canción popular chilena. O concerto do Tetro Colón recolle a obra e o legado de Violeta abordando e recreando algunhas das súas músicas máis representativas coa presencia de Tita Parra, que coñece mellor que ninguén o legado da súa avoa, e que nos guiará na viaxe polo universo musical de Violeta.

Muller, artista, poeta, a máis grande que saíu do pobo chileno, Violeta Parra segue a ser un patrimonio non só dos chilenos e chilenas senón para o resto do mundo que aínda cre na igualdade e nun futuro mellor para a humanidade.

As invitacións, de balde, para o concerto pódense recoller na billeteira do Teatro Colón.
Xoves 21, de 16.30h a 20.00h
Venres 22, de 16.30h a 20.00h
Sábado 23, de 12:00h a 14:00h e 16.30h a 20.00h
Domingo 24, de 12:00h a 14:00h e 16.30h a 19.00h
Luns 25, de 12:00h a 14:00h e 16.30h a 20.30h
Os horarios de apertura están dispoñibles en www.teatrocolon.es.