Finaliza o prazo de inscrición nos cursos de catalán, checo e danés da Deputación da Coruña

Mañá, xoves 21 de setembro, é o último día para inscribirse nos tres cursos gratuítos de iniciación ao catalán, o checo e o danés, que organiza a Deputación da Coruña, a través do centro oficial de información da Comisión Europea, Europe Direct.

Os cursos terán lugar entre o 26 e o 28 de setembro, coincidindo coa celebración do Día Europeo das Linguas. Trátase da oitava edición da iniciativa “Fálame. Semana Europea das Linguas”, impulsada pola Deputación co obxectivo de promover a diversidade lingüística entre os coruñeses, sensibilizar sobre a importancia da aprendizaxe de idiomas e poñer en valor a multiculturalidade existente na Unión Europea.

Os obradoiros, totalmente gratuítos e de dúas horas de duración, impartiranse por profesores nativos, que ademais da súa lingua, presentarán a súa cultura e os seus países ou rexións de orixe. Todos os participantes recibirán un certificado de asistencia.

O prazo de inscrición está aberto ata mañá ás 14.00 horas e pode realizarse enviando un correo electrónico a europedirect@dicoruna.es ou chamando ao 981 080 331.