A Xunta reparte 1,8 millóns de euros entre 9 Áreas de Rehabilitación Integral de 6 concellos ourensáns

A Xunta de Galicia financiará con preto de 1,8 millóns de euros 9 Áreas de Rehabilitación Integral (ARI) declaradas en 6 concellos da provincia de Ourense. Os fondos repartidos entre os concellos que dispoñen de ARI no seu territorio, realizado en función das solicitudes presentadas pola administración local, son achegados polo Ministerio de Fomento e polo IGVS.

Castro Caldelas: 40.415,89
Celanova: 40.836,89
Ourense: 1.383.739,19
Ribadavia: 96.701,76
Vilar de Santos: 99.692,54
Xunqueira de Ambía: 96.701,76
TOTAL: 1.758.088,03

Unha vez comunicados os fondos do reparto correspondente aos obxectivos de 2017, os concellos deberán comunicar ao IGVS as actuacións previstas, presentando a documentación acreditativa. No caso de concellos que dispoñen de máis dunha ARI declarada no seu ámbito, como é o caso do da cidade das Burgas, será a propia administración municipal a encargada de realizar o reparto dos fondos entre as mesmas. O concello de Ourense actualmente ten declaradas catro Áreas de Rehabilitación Integral: Seixalbo, Casco histórico, Polvorín-Camelias-A Carballeira e Serra San Mamede-Cruceiro Quebrado-A Inmaculada.

Os concellos deberán regular os prazos para a presentación de solicitudes por parte dos propietarios de vivendas interesados na súa rehabilitación.

Os beneficiarios finais dos fondos repartidos serán os propietarios de vivendas e edificios de vivendas emprazados no ámbito das Áreas de Rehabilitación Integral, que recibirán axudas a fondo perdido para as actuacións de rehabilitación que realicen. Tamén se poderán beneficiar das axudas os propios concellos para a realización de actuacións de urbanización e reurbanización no ámbito das ARI. Ademais, a Xunta, con fondos propios, financia as oficinas de rehabilitación municipais.