Os concellos de Lugo recibirán máis de 4,1 millóns de euros para mellorar os seus camiños rurais

Os concellos de Lugo recibirán unha axuda total de algo máis de 4,1 millóns de euros para o acondicionamento de camiños rurais de titularidade municipal. O director xeral de Desenvolvemento Rural, Miguel Pérez Dubois, acompañado polo delegado territorial da Xunta, José Manuel Balseiro, presentou esta mañá os detalles desta iniciativa aos alcaldes da provincia.

O director xeral sinalou que estas actuacións nos camiños enmárcanse no obxectivo xeral do Goberno galego de fixar poboación no rural e mellorar a calidade de vida dos seus habitantes, a través de diferentes iniciativas que buscan entre outros fins o da cohesión territorial. Intégrase no Plan de fixación dotado cun total de 231 millóns de euros.

A posta en valor de vías rurais permitirá actuar nuns 650 quilómetros en toda a comunidade ao longo dos vindeiros dous anos. Así, facilitarase a accesibilidade a predios e explotacións agroforestais, así como aos núcleos de poboación, unhas actuacións para as que se dedicarán 16 millóns de euros no conxunto de Galicia, cunha porcentaxe de axuda do 100% dos gastos subvencionables, agás o IVE, que correrá a conta dos concellos.

O director xeral explicou ademais que o reparto destes fondos fíxose de acordo coa Federación Galega de Municipios e Provincias (Fegamp), tendo en conta criterios obxectivos, como a poboación ou a ruralidade.