publicidade hoxe

A Xunta convoca aos titulares dos terreos afectados pola construción dunha senda na estrada AC-840, en Curtis, para o 19 de xullo

PUBLICADO EN: Noticias de GaliciaCurtis
A-
A+

A Consellería de Infraestruturas e Vivenda convoca para o vindeiro 19 de xullo aos propietarios dos terreos afectados pola execución dunha senda na estrada AC-840, entre a travesía de Curtis e Alto da Espeniña, no Concello de Curtis, para o levantamento de actas previas á ocupación.

Os titulares dos terreos afectados deberán achegarse ás 9.30 horas á oficina municipal do recinto feiral deste municipio.

O Goberno galego financia estas actuacións coa achega dun investimento de máis de 495.000 euros e está prevista a licitación do contrato proximamente.

O Decreto de Utilidade Pública comprende as expropiacións das 11 fincas necesarias para a execución dun itinerario seguro e accesible para uso peonil na estrada AC-840 (Betanzos – límite de provincia– Agolada) no Concello de Curtis, dende Alto da Espeniña ata a intersección existente coa AC-230, na travesía de Curtis.

Executarase unha senda peonil na marxe dereita da AC-840 que terá unha lonxitude de 1.730 m, no tramo comprendido entre o Pq. 20+145 (en Alto da Espeniña, dando continuidade a un camiño existente) e o 21+880 (intersección coa estrada autonómica AC-230, en Curtis). A sección tipo consta dunha senda de 2,1 metros de ancho mínimo, de formigón coloreado e separada da calzada por unha zona axardinada de 0,5 m mais cuneta de seguridade.

As obras previstas comprenden a mellora da intersección coa estrada ao cemiterio para facilitar os cambios de sentido nese punto, e a rehabilitación do firme na contorna da mesma, así como a execución de dous muros de contención do terreo.

Coa execución da senda existirá un itinerario peonil continuo neste tramo, no que se localiza un importante número de vivendas, o que ocasiona na zona un notable tránsito de peóns que actualmente ten que circular pola beiravía.

26 de xuño de 2017 | 17:19 • Sen comentarios

Comentarios pechados.