A Consellería de Sanidade aborda con provedores os proxectos do Sergas no ámbito de compras e loxística

O Servizo Galego de Saúde está a desenvolver na actualidade importantes proxectos no ámbito das compras e a loxística do sistema sanitario público, como o Catálogo de Produtos do Sergas e a Plataforma Loxística. Co obxectivo de informar de todos estes novos proxectos, realizouse esta mañá unha xornada informativa na Consellería de Sanidade, de tal forma que se poidan establecer sinerxías co mercado que permitan un desenvolvemento eficaz deste proceso.

A directora de Recursos Económicos do Servizo Galego de Saúde, María Jesús Piñeiro Bello, destacou que con este acto, dirixida a todos os provedores de produtos sanitarios e non sanitarios e ás súas asociacións representativas e sectoriais, o Sergas busca unha maior transparencia, colaboración, eficiencia e sustentabilidade na súa cadea de compras e loxística.