publicidade hoxe

Cen nenos de Barbanza e Costa da Morte participan na campaña de esquí da Deputación

PUBLICADO EN: Noticias de GaliciaA Coruña
A-
A+

Un centenar de nenas e nenos de entre 10 e 14 anos dos concellos de Boiro, Brión, Camariñas, Carnota, Cee, Corcubión, Dodro, Dumbría, Fisterra, Lousame, Muros, Noia, Outes, Padrón, A Pobra do Caramiñal, Porto do Son, Ribeira, Vimianzo e Zas participan dende o pasado domingo na estación invernal de Leitariegos (León) na terceira expedición á neve da Campaña de Esquí 2017, organizada pola área de Deportes da Deputación da Coruña.

Ata o vindeiro venres 17, os escolares destes vinte e un concellos coruñeses terán a oportunidade de iniciarse ou perfeccionar a práctica do esquí con monitores profesionais e participar en numerosas actividades deportivas e culturais que se organizan de xeito complementario.

500 nenos da provincia aprenden a esquiar coa Deputación

O deputado responsable de Deportes da institución provincial coruñesa, José García Liñares, subliñou a “gran aceptación” coa que conta cada ano este programa, que ata finais de marzo achegará a práctica do esquí a un total de cincocentos rapaces dos 93 concellos coruñeses.

A estación de Leitariegos, ubícase na comarca de Laciana, ao noroeste da provincia de León. Trátase dunha excepcional paraxe natural reserva da Biosfera que limita co Principado de Asturias e que conta con dez pistas balizadas de distintos niveis (cinco vermellas, catro azuis e unha verde) e un snowpark, así como unha escola na que ofrecen clases de esquí e snowboard.

14 de marzo de 2017 | 19:08 • Sen comentarios

Comentarios pechados.