A Deputación da Coruña destina 1.600.000 euros ás entidades da área de Servizos Sociais

A área de Servizos Sociais da Deputación da Coruña apoia ás entidades sen ánimo de lucro do sector a través de dúas liñas de subvencións, unha para actividades e programas e outra para investimentos, dotadas cunha cantidade de 1.600.000 €.

As entidades que traballan no ámbito de Servizos Sociais poderán concorrer a dúas liñas de axudas da área da Deputación da Coruña, unha para gastos de mantemento de centros, servizos, programas ou para desenvolver actividades e outra para investimentos. A primeira está dotada con 1.000.000 de euros e a segunda con 600.000.

“As entidades que están a traballar no ámbito dos servizos sociais demostran día a día que fan un labor imprescindíbel en colectivos que máis colaboración precisan e por iso desde a área de Servizos Sociais queremos apoiar o seu labor nun ámbito fundamental para contribuír a unha sociedade máis xusta e igualitaria con protección para todas as persoas”, sinala Ánxela Franco, deputada responsábel da área de Servizos Sociais.

As entidades que opten á liña de programas de servizos sociais poderán optar a subvencións de ata 60.000 € mentres que as que concorran á de investimentos poderán recibir até 320.000 euros nunha liña que contempla dúas modalidades, unha para orzamentos comprendidos entre 750 e 100.000€ e outra de 101.000 a 400.000€.

“Decidimos apoiar tanto os programas como os investimentos con liñas de concorrencia competitiva, en pé de igualdade e cun reparto que sigue criterios obxectivos co fin de eliminar a discrecionalidade das subvencións nominativas”, explicou a deputada Ánxela Franco das dúas liñas de subvención en Servizos Sociais.

Na liña de programas de servizos sociais, as entidades poderán solicitar axudas para gastos de mantemento de centros, servizos estables, programas ou para o desenvolvemento de actividades. Con orzamentos de 100.000 € como máximo e 750 como mínimo. Os gastos subvencionábeis, pola súa parte, na de investimentos son aplicacións informáticas, construcións, infraestruturas, maquinarias, ferramenta, mobiliario, equipos para procesos de información ou outro inmobilizado material.

Centros, programas e actividades

As dúas liñas diríxense ao apoio de servizos sociais das áreas de familia, infancia e mocidade; persoas maiores, diversidade funcional; drogodependencias e outros trastornos aditivos; minorías étnicas e inmigración ou persoas en risco ou situación de exclusión ou especiais dificultades de inserción social ou laboral. Desta maneira, desde a área de Servizos Sociais da Deputación apóiase o labor de centros de menores, centros de atención á infancia, residencias, tratamentos de rehabilitación, unidades de día, comunidades terapéuticas, respiro familiar, apartamentos tutelados, programas de formación para o emprego, albergues, centros de acollida ou comedores sociais, entre outras.

Nas convocatorias, terase en conta para a valoración xeral dos proxectos a inclusión do principio de transversalidade de xénero coa finalidade de fomentar a igualdade de oportunidades entre homes e mulleres.