A Deputación da Coruña convoca unha xuntanza coas entidades de Servizos Sociais e Igualdade para poñer en común liñas de colaboración

A Área de Servizos Sociais e Igualdade convoca ás asociacións do ámbito a unha xuntanza na Deputación da Coruña co fin de poñer en común as distintas liñas de colaboración. A reunión terá lugar o vindeiro día 17 de marzo ás 10 horas.

As entidades que traballan no ámbito de Servizos Sociais e Igualdade están convocadas a participar nunha xuntanza que terá lugar na sede da Deputación da Coruña -Avenida do Porto n.2, 15003, A Coruña- en que se tratará as distintas liñas de colaboración que se desenvolven desde a área que dirixe a deputada Ánxela Franco.

Na xuntanza, analizaranse, entre outras iniciativas, as bases das convocatorias da área para mantemento de servizos sociais, investimentos, políticas de igualdade e loita contra a violencia de xénero e programas sociosanitarios. A reunión está na liña da celebrada en 2016 e nela explicaranse as principais novidades das liñas de apoio da área de Igualdade e Servizos Sociais ás entidades do sector e novas vías de cooperación e traballo conxunto.

As cinco liñas de axuda da área de Servizos Sociais da Deputación da Coruña teñen xa aberto o prazo de presentacións de solicitudes que remata o día 20 de abril ás 14:00 horas. Catro das liñas están destinadas a entidades sen fin de lucro, dúas para servizos sociais, tanto programas como investimento, unha para programas de políticas de igualdade e contra a violencia machista e outra para programas sociosanitarios e unha para concellos, para Servizos Sociais Comunitarios.

“Para nós, desde a área de Servizos Sociais e Igualdade é fundamental o diálogo e o traballo en cooperación coas entidades do ámbito que están a facer un labor fundamental”, sinala a responsábel da área na Deputación, Ánxela Franco que destaca a necesidade de diálogo e encontro coas propias entidades para a coordinación do traballo, obxectivo da próxima xuntanza.

As dúas liñas de servizos sociais das entidades sen fin de lucro están dotadas con 1.600.000 €, 1.000.000 de euros para programas e 600.000 para investimentos. As entidades que opten á liña de programas de servizos sociais poderán optar a subvencións de ata 60.000 € mentres que as que concorran á de investimentos poderán recibir até 320.000 euros nunha liña que contempla dúas modalidades, unha para orzamentos comprendidos entre 750 e 100.000€ e outra de 101.000 a 400.000€.

Na liña de programas de servizos sociais, as entidades poderán solicitar axudas para gastos de mantemento de centros, servizos estables, programas ou para o desenvolvemento de actividades. Os gastos subvencionábeis, pola súa parte, na de investimentos son aplicacións informáticas, construcións, infraestruturas, maquinarias, ferramenta, mobiliario, equipos para procesos de información ou outro inmobilizado material.

A área Igualdade da Deputación da Coruña apoia as entidades que desenvolven políticas de igualdade de oportunidades entre mulleres e homes e loitan contra a violencia de xénero a través dunha liña de axudas dotada con 300.000 euros. As entidades poderán recibir entre 600 e 40.000 € para actividades que teñan un orzamento de entre 100.000 e 750 €.A Deputación apoiará así propostas de empoderamento e participación social, de fomento da igualdade de xénero, de fomento do emprego en igualdade de oportunidades e de conciliación e responsabilidades compartidas no ámbito de programas de igualdade e actividades dirixidas á prevención, sensibilización e identificación da violencia de xénero e tamén de tratamento integral das persoas no ámbito da violencia de xénero.

As liñas destinadas ás entidades de Servizo Sociais complétanse coa que ten como obxectivo o mantemento de programas socio sanitarios cun orzamento consignado de 320.000€ que teñen como obxectivo programas de carácter preventivo, informativo ou formativo dirixidos tanto a colectivos de Servizos con enfermidades como a familiares e programas de apoio dirixidos a colectivos con doenzas e familiares para tratamentos e consecuencias.